भुसावळ शहरातील हद्दवाढीचा प्रश्न मार्गी लावणार : मंत्री संजय सावकारे

11 महिन्यात 24 तास पाणी देणार
मंत्री सावकारे म्हणाले की, केंद्र शासनाची महत्वकांक्षी योजना असलेल्या अमृत योजना टप्पा दोनची कामे वेगात सुरू असून टप्पा एकची काही कामे कंत्राटदाराने न केल्याने त्याला ब्लॅकलिस्ट करण्याची प्रक्रिया सुरू आहे. 11 महिन्यात योजनेचे काम पूर्ण होवून शहरवासीयांना 24 तास योजनेच्या माध्यमातून पाणी मिळेल, असा विश्वास मंत्री संजय सावकारे यांनी व्यक्त केला.

बस पोर्टचा प्रश्न सोडवणार
सभेची जागा बसपोर्टसाठी नियोजित असून जागा हस्तांतर मध्य रेल्वेत नूतन महाव्यवस्थाकांची नियुक्ती नसल्याने रखडल्याने लवकरच ही प्रक्रिया पूर्ण होईल व जिल्ह्याबाहेर जाणार्‍या बसेस येथून सुटतील तसेच
जुगादेवीजवळ वन्य प्राण्यांसाठी पर्यटन स्थळ मंजूर असल्याने त्याचेदेखील काम होईल, असे ते म्हणाले.

युती असल्याने टीका-टीप्पणी टाळा
मंत्री संजय सावकारे म्हणाले की, जिथे युती नसली तरी तेथे टोकाच्या भूमिका घेवून टीका टीप्पणी करू नका. जळगाव जिल्ह्यात 15 ठिकाणी भाजपाचे नगराध्यक्ष निश्चितपणे निवडून येतील, असा विश्वास त्यांनी व्यक्त कीरत ही कार्यकर्त्यांची निवडणूक नागरिकांशी निगडीत असल्याचे सांगितले. ज्यांची सत्ता आहे त्यांचा नगराध्यक्ष असल्यानंतरच स्थानिक प्रश्न सुटणार असून कार्यकर्त्यांनी ही बाब नागरिकांना पटवून द्यायची आहे, असे आवाहन त्यांनी केले. 15 पैकी 12 जागांवर महिलाराज असल्याने काही दिवसांनी आम्हा पुरूषांनाच आरक्षण मागण्याची वेळ येईल, अशी मिश्कील टीपणी त्यांनी केली. भुसावळात भाजपा 45 जागा लढवत असून 31 जागांवर महिला तर वरणगावात 21 पैकी 13 जागांवर महिला लढत असल्याचे ते म्हणाले.

हद्दवाढीसह काँक्रिट रस्ते होणार
भुसावळातील मुख्य रस्ते असलेल्या जामनेर रोड, जळगाव रोड आदी रस्त्यांचे काँक्रिटीकरण मंजूर आहे मात्र खोदकाम सुरू झाले की नागरिक शिव्या घालतात त्यामुळे निवडणुकीनंतर या कामांना सुरूवात होवून प्रश्न सुटतील तसेच नगरपालिका हद्दीतील जवळपास 70 टक्के रस्त्यांचे काँक्रिटीकरण होणार असल्याचे त्यांनी सांगत हद्दवाढीचा प्रस्ताव मोठा झाल्याने तो मंजूर होवू शकला नाही मात्र नव्याने प्रस्ताव केला असून आचारसंहितेमुळे तो मंजूर झाला नसलातरी लवकरच तो मंजूर होईल व जी जागा नगरपालिका व ग्रामपंचायत हद्दीत नाही त्या भागाची हद्दवाढ होवून नागरि सुविधा या भागातील नागरिकांना मिळतील, असे त्यांनी सांगितले. आपल्या नेतृत्वात इतिहासात पहिल्यांदाच भुसावळ पालिकेवर भाजपाचा भगवा फडकला, असेही ते म्हणाले. माझे टेक्सटाईल हब मंत्री महाजनांनी पळवले मात्र तुम्ही पुन्हा द्या, अशी मागणी त्यांनी मुख्यमंत्र्यांना करीत एमआयडीसीत मोठा उद्योग आणण्याची विनंती केली.