Will resolve the issue of boundary extension in Bhusawal! BJP candidate Rajni Savkare भुसावळ (24 नोव्हेंबर 2025) : भुसावळसाठी अमृत योजना मंजूर झाल्यानंतरचे श्रेय अनेकांनी लाटले मात्र ती योजना पूर्णत्वास आणण्यासाठी मंत्री संजय सावकारे प्रयत्न करीत आहेत. गेल्या चार वर्षांच्या काळात प्रशासकीय काळात अत्यंत चांगले काम झाले असून 70 टक्के रस्त्यांची कामे पूर्ण झाली आहेत व यासाठी मंत्री संजय सावकारे यांचा पाठपुरावा मोलाचा असल्याचे भाजपा नगराध्यक्ष पदाच्या उमेदवार रजनी संजय सावकारे येथे म्हणाल्या. नागरिकांनी संधी दिल्यास शहराच्या हद्दवाढीचा तसेच नाट्यगृहाचा प्रश्न मार्गी लावू, असेही त्यांनी सांगितले. जळगाव जिल्ह्यातील भाजपा उमेदवारांच्या प्रचारार्थ पु.ओं.नाहाटा महाविद्यालयासमोरील नियोजित बसस्थानकाच्या जागेवर सोमवारी सायंकाळी पाच वाजता झालेल्या मुख्यमंत्र्यांच्या उपस्थितीत झालेल्या सभेत त्या बोलत होत्या.
यांची व्यासपीठावर उपस्थिती
व्यासपीठावर मुख्यमंत्री देवेंद्र फडणवीस, मंत्री गिरीश महाजन, वस्त्रोद्योग मंत्री संजय सावकारे, केंद्रीय क्रीडा राज्य मंत्री रक्षा खडसे, खासदार स्मिता वाघ, आमदार मंगेश चव्हाण, आमदार अमोल जावळे, आमदार राजूमामा भोळे, भाजपा जिल्हाध्यक्ष चंद्रकांत चौधरी, डॉ.राध्येश्याम चौधरी, माजी खासदार डॉ.उल्हास पाटील, अशोक कांडेलकर, नंदू महाजन, डॉ.केतकी पाटील, माजी नगरसेवक पिंटू कोठारी यांच्यासह भाजपाचे नगराध्यक्ष पदाचे 14 उमेदवार तसेच निवडणूक रिंगणातील इच्छूक उमेदवार व पदाधिकारी उपस्थित होते.
तो पर्यंत रोटेशन पद्धत्तीने पाणीपुरवठा
शहराची पाणीपुरवठा योजना सुरळीत करण्यासाठी किमान दिड वर्षांचा अवधी लागणार असून तो पर्यंत रोटेशन पद्धत्तीने पाणीपुरवठा होणार असल्याचे भाजपा नगराध्यक्ष पदाच्या उमेदवार रजनी सावकारे यांनी सांगितले. भुसावळातील सांडपाण्यासाठी भुयारी गटारीचा प्रस्ताव सादर करण्यात आला असून आगामी काळात तोही मंजूर होवून ड्रेनेज व स्वच्छतेचा प्रश्न मार्गी लागेल व या माध्यमातून चांगले आरोग्य अबाधीत राहील शिवाय भुसावळात क्रीडा संकुलाचा प्रश्न मार्गी लागला आहे.
समाजकारणावर आपला भर
आम्ही नाट्य व कला प्रेमी असल्याने शहरात नाट्यगृह व्हावे ही शहरवासीयांची इच्छा असलीतरी शहरात जागा नसल्याची अडचण आहे मात्र त्यावरही तोडगा काढू, असे त्यांनी सांगत नगराध्यक्ष पदाची संधी मिळाल्यास भुसावळ शहरातील हद्दवाढीचा प्रश्न मार्गी लावण्याचा आपला मानस असेल, असे त्यांनी सांगितले. राजकारण आपला पिंड नसलातरी समाजकारणावर आपला अधिक भर असून सामाजिक उपक्रम घेत आल्याचे त्यांनी स्पष्ट केले.
