भुसावळ (26 नोव्हेंबर 2025) : भुसावळ तालुक्यातील साकेगाव येथील श्री स्वामीनारायण गुरुकुल विद्यालयात 26 नोव्हेंबर रोजी संविधान दिन साजरा करण्यात आला. अध्यक्षस्थानी शाळेतील मुख्याध्यापिका प्रणिता चौधरी होत्या. प्रमुख पाहुणे गोपाळ भगत होते. मुख्याध्यापक मनोज भोसले, अभिष सरोदे, मुख्याध्यापिका उज्वला धांडे या उपस्थित होत्या.
संविधान प्रास्ताविकेचे वाचन
कार्यक्रमाच्या सुरुवातीस सर्व मान्यवरांनी संविधान प्रतीचे व डॉक्टर बाबासाहेब आंबेडकरांच्या प्रतिमेचे पूजन करून पुष्पहार अर्पण करण्यात आला. भारताचे सर्वोच्च कायदे देणारे संविधान 26 नोव्हेंबर 1949 रोजी स्वीकारले. यानिमित्ताने शाळेत संविधानाच्या प्रास्ताविकेचे वाचन, संविधानाचे महत्त्व यावर मार्गदर्शन करण्यात आले. मुख्याध्यापक मनोज भोसले यांनी विद्यार्थ्यांना संबोधित करताना सांगितले की,आपले संविधान हे आपल्या देशाचा आत्मसन्मान आहे. ते दिलेले अधिकार आणि कर्तव्ये जाणून त्यांची जपवणूक करणे ही सर्वांची जबाबदारी आहे.
दहशतवादी हल्ल्यातील जवानांना श्रद्धांजली
याच दिवशी शाळेत 26/11 मुंबई दहशतवादी हल्ल्यात शहीद झालेल्या वीर जवानांना आणि निरपराध नागरिकांना श्रद्धांजली अर्पण करण्यात आली. तसेच दोन मिनिटे मौन पाळून त्यांना आदरांजली अर्पण केली. सूत्रसंचालन करताना मनोज भोसले सरांनी 26/11 हल्ल्याची माहिती, सुरक्षा दलाचे योगदान आणि त्यांच्या पराक्रमाची माहिती विद्यार्थ्यांना दिली. व देशासाठी प्राणार्पण करणार्‍या जवानांविषयी कृतज्ञता व्यक्त केली.
