भुसावळकरांचा कौल भाजपालाच मिळणार : प्रभाग 11 व 19 रॅलीप्रसंगी रजनी सावकारे यांचा विश्वास
भुसावळ (26 नोव्हेंबर 2025) : भुसावळकरांचा कौल निश्चितपणे भाजपालाच मिळणार असून नगराध्यक्ष निवडणुकीत निश्चितपणे आपला विजय होईल, असा विश्वास पालिका निवडणुकीतील भाजपा महायुतीच्या लोकनियुक्त नगराध्यक्ष पदाच्या उमेदवार रजनी संजय सावकारे यांनी व्यक्त केला. बुधवारी सायंकाळी प्रभाग क्रमांक 11 आणि 19 मध्ये भाजपा उमेदवारांसह त्यांच्या प्रचारार्थ मोठी रॅली निघाली. या रॅलीचे ठिकठिकाणी स्वागत करण्यात आले.
पदाधिकार्‍यांचा रॅलीत सहभाग
या रॅलीत उमेदवार बबलू बर्‍हाटे, मेघा वाणी, भारतीय जनता पार्टी-शिवसेना-रिपाइं-लहुजी शक्ती सेना महायुतीचे सर्व पदाधिकारी, आजी-माजी नगरसेवक, मोर्चा-आघाडीचे पदाधिकारी आणि कार्यकर्ते तसेच शहराध्यक्ष संदीप सुरवाडे, किरण कोलते, सरचिटणीस पवन बुंदेले, अमोल महाजन आदी उपस्थित होते.
रोजगार निर्मितीसह समस्यांच्या निराकरणाला प्राधान्य
यावेळी रॅलीदरम्यान नगराध्यक्षपदाच्या पदाच्या उमेदवार रजनी सावकारे यांनी नगराध्यक्ष पदाची संधी मिळाल्यास शहराचा चेहरा-मोहरा बदलवण्याची ग्वाही दिली तसेच पाणीपुरवठा, स्वच्छता, रस्ते-सांडपाणी प्रकल्प, महिलांसाठी सुरक्षित वातावरण आणि युवकांसाठी रोजगारसंधी निर्माण करण्याचे आश्वासन दिले.
या प्रचार दौर्‍याची सुरुवात प्रभाग 11 आणि 19 मधील विठ्ठल मंदिर परिसरातून झाली. देवस्थानात दर्शन घेऊन विजयाची कामना करण्यात आली आणि त्यानंतर रॅलीला सुरूवात झाली. समर्थकांकडून घोषणाबाजी, ढोल-ताशांचे नाद आणि गुलालाच्या वर्षावाने वातावरण दणाणून गेले.
