वरणगाव पालिका निवडणुकीतील आपली लढाई धनशक्ती विरोधात : अपक्ष उमेदवार सुनील काळे
वरणगाव (26 नोव्हेंबर 2025) : वरणगाव पालिका निवडणुकीतील आपली लढाई धनशक्ती विरोधातील जनशक्तीची आहे व या आपल्या लढाईत वरणगावातील सर्व जाती-धर्माचे लोक सहभागी झाले असून जनमताचा कौल आपल्या बाजूनेच असेल, असा ठाम विश्वास वरणगाव पालिका निवडणुकीतील नगराध्यक्ष पदाचे अपक्ष उमेदवार सुनील काळे यांनी व्यक्त केला. भाजपाने आपण निष्ठावान असतानाही तिकीट कापल्याच्या मुद्यावरून त्यांनी नेत्यांना खडे बोल सुनावले.
विकासाचे चिन्ह मिळाले : जनतेचा आशीर्वाद आपल्यासोबत
बुधवार, 26 रोजी रिंगणातील उमेदवारांना चिन्हाचे वाटप करण्यात आल्याने सुनील काळे यांना ट्रॅक्टर हे चिन्ह मिळाल्यानंतर त्यांनी ट्रॅक्टरवर बसून संपूर्ण गावात फेरफटका मारत लक्ष वेधले. माध्यमांशी बोलताना ते म्हणाले की, आपल्याला विकासाचे चिन्ह मिळाले असून ट्रॅक्टर मिळणार हे अपेक्षित होते.
पाणी दररोज आणण्याचा प्रयत्न
वरणगावात 17 दिवसाआड येणारे पाणी आपल्या जनआंदोलनानंतर चार दिवसांवर आले व हे पाणी आता दररोज आणायचे आहे त्यासाठी वरणगावकरांची मोलाची साथ अपेक्षित आहे. वरणगावातील सर्व जाती-धर्माचे लोक अन्यायाच्या माध्यमातून माझ्यासोबत असून आपली लढाई धनशक्तीविरोधात जनशक्तीची आहे. ज्या पक्षासाठी रक्ताचे पाणी केले त्या पक्षाने आपल्याला वार्‍यावर सोडले मात्र निष्ठावान कार्यकर्त्यांचे उपकार आपण विसरणार नाही, निष्ठावानांचे आपण धन्यवाद देतो, असेही ते म्हणाले. आमची लढाई अन्यायाविरोधातील असून आम्ही पक्षासाठी काय नाही केले? वरणगावकर त्यांचा राग मतपेटीतून दाखवून देतील, असा विश्वासही त्यांनी यावेळी व्यक्त केला.
