वरणगावकरांना 24 तास पाणी देणार ; कुठलेही मीटर असणार नाही : अपक्ष उमेदवार सुनील काळे यांची ग्वाही
वरणगाव (26 नोव्हेंबर 2025) : भाजपाचा निष्ठावंत म्हणून पक्षाकडे उमेदवारी मागणे हा माझा गुन्हा आहे का? असा प्रश्न वरणगाव पालिकेतील नगराध्यक्ष पदाचे अपक्ष उमेदवार सुनील काळे यांनी उपस्थित करीत पक्षासाठी 24 तास काम करूनही जात व पैसा पाहून उमेदवारी देण्यात आल्याच आरोप करीत शहरातील निवडणूक जनतेने हातात घेतल्याचे सांगत जनतेच्या घामाच्या पैशातून आपण निवडणूक रिंगणात असल्याचे सांगितले. आपल्याला सत्ता मिळाल्यास वरणगावकरांना 24 तास पाणी देवू, पाण्यासाठी कुठलेही मीटर असणार नाही, अशी ग्वाही उमेदवार काळे यांनी बुधवारी रात्री विकास कॉलनी परिसरातील सभेत दिली.
वरणगावात पाणी पेटले तेव्हा हे कुठे होते?
काही नेते म्हणत होते वरणगावात भाजपाचा झेंडा फडकण्यासाठी माणूस ठेवणार नाही मात्र त्यावेळी आपण पक्षाची धूरा सांभाळली मात्र असे असतानाही आपली पक्षाने उमेदवारी कापली. वरणगाव शहरात जेव्हा पाणी प्रश्न पेटला, 17 दिवसाआड पाणीपुरवठा होत असताना तेव्हा हे कुठे होते? असा प्रश्न त्यांनी कुणाचेही नाव न घेता उपस्थितांना विचारला.
लोकसहभागातून निवडणूक
भाजपाने जात व पैसा पाहून येथे उमेदवारी दिली मात्र मला माझी जात माहित नव्हती कारण जात पाहून आपण कधीही काम केले नाही, आलेल्या प्रत्येकाला आपण न्याय देत गेलो मात्र आता मी अपक्ष म्हणून निवडणूक रिंगणात असून लोकसहभागातून आपण निवडणूक लढवत असल्याचे त्यांनी सांगितले. जनतेच्या घामाच्या पैशातून आपण ही निवडणूक लढवत आहोत, जनतेने आपल्याला कौल द्यावा, असे आवाहन त्यांनी केले.
