जळगाव जिल्ह्यात 1 व 2 डिसेंबरला मतदान केंद्र म्हणून वापरल्या जाणार्‍या शाळांना सुटी जाहीर
जळगाव (27 नोव्हेंबर 2025) : राज्य निवडणूक आयोगाकडून नगर परिषद व नगर पंचायत सार्वत्रिक निवडणूक 2025 चा कार्यक्रम जाहीर झाल्यानुसार जळगाव जिल्ह्यातील 16 नगरपरिषद आणि 2 नगरपंचायतींत 2 डिसेंबर रोजी मतदान तर 3 डिसेंबर रोजी मतमोजणी होणार आहे.
या पार्श्वभूमीवर भुसावळ, अमळनेर, चाळीसगाव, चोपडा, जामनेर, पाचोरा, भडगाव, धरणगाव, एरंडोल, पारोळा, फैजपूर, सावदा, रावेर, यावल, वरणगाव, नशिराबाद या 16 नगरपरिषदांसह मुक्ताईनगर व शेंदुर्णी या दोन नगरपंचायत हद्दीतील मतदान केंद्र म्हणून वापरल्या जाणार्‍या शाळांमध्ये 1 आणि 2 डिसेंबर 2025 रोजी सुटी जाहीर करण्यात आली आहे.
मतदानाच्या एक दिवस आधी म्हणजेच 1 डिसेंबर 2025 रोजी संबंधित मतदान अधिकारी , कर्मचारी मतदान केंद्रांवर पोहचणार असल्याने ही सुटी देण्यात आल्याचे प्रशासनाने सांगितले.
ही सुटी राज्य निवडणूक आयोगाच्या उपसचिव यांच्या आदेश क्रमांक रानिआ/मनपा2008/प्र.क्र.9/का-5 दिनांक 11 नोव्हेंबर 2008 अन्वये देण्यात आली आहे. जिल्ह्यातील पालक व विद्यार्थी यांनी संबंधित शाळांच्या सुट्यांची नोंद घ्यावी, अशी माहिती प्रशासनाकडून देण्यात आली आहे.
