भुसावळ पालिका निवडणूक : सोशल मीडियावर आक्षेपार्ह मजकूर दिसल्यास लागलीच गुन्हा
भुसावळचे डीवायएसपी संदीप गावीत यांचा इशारा
भुसावळ (28 नोव्हेंबर 2025) : भुसावळ पालिका निवडणुकीची धामधूम सुरू होताच शहरात पोलिस प्रशासन अधिक सतर्क झाले आहे. विशेषत: सोशल मीडियावर होणार्‍या अफवा, दिशाभूल करणारे संदेश, धार्मिक तेढ निर्माण करणारे पोस्ट,व् यक्ती वा पक्षांची बदनामी करणारे व्हिडिओ/रील्स यावर पोलिसांची कडक नजर राहणार असल्याची माहिती डीवायएसपी संदीप गावीत यांनी दिली.
निवडणुकीत सर्वाधिक गोंधळ सोशल मीडियावरूनच निर्माण होतो. व्हॉट्सअ‍ॅपग्रुप, फेसबुक पोस्ट, इंस्टाग्राम रील्स, यूट्यूब व्हिडिओ अशा सर्व माध्यमांवर पथक सतत मॉनिटरिंग करणार आहे. कोणत्याही प्रकारचा आक्षेपार्ह, भडकावू, द्वेषपूर्ण, खोटी माहिती पसरवणारा मजकूर आढळल्यास संबंधितांवर थेट गुन्हा दाखल करण्याच्या सूचना देण्यात आल्याचे गावीत यांनी सांगितले.
शहरातील सर्व राजकीय, सामाजिक तसेच युवकांनी चालवलेल्या ग्रुपचे देखील तांत्रिक निरीक्षण सुरू करण्यात आले आहे. निवडणुकीत कोणतीही अनुचित घटना घडू नये आणि शहरात शांतता व कायदा-सुव्यवस्था राखण्यासाठी पोलिसांनी आक्रसून पावले उचलली असल्याचे स्पष्ट दिसत आहे.
यासोबतच, भ्रामक माहिती पसरू नये म्हणून नागरिकांनी सावध राहावे, पडताळणी न केलेली पोस्ट फॉरवर्ड करू नये आणि सोशल मीडियाचा जबाबदारीने वापर करावा, असे आवाहनही पोलिसांनी केले आहे.
पालिका निवडणूक पारदर्शक व शांततेत पार पाडण्यासाठी पोलिस प्रशासन सज्ज असून सर्व विभागांना सतर्कतेच्या सूचना देण्यात आल्या आहेत. शहरातील बाजारपेठ पोलिस ठाणे, शहर पोलिस ठाणे यांच्या प्रभारी अधिकारी यांना कारवाई करण्याच्या सूचना केल्या आहे.
