भुसावळ शहरातील 30 मतदान केंद्रांवर वेब कॉस्टींग होणार
निवडणूक आयोगासह निवडणूक अधिकारी पाहू शकतील कार्यालयात
भुसावळ (28 नोव्हेंबर 2025) : भुसावळ पालिका निवडणूकीच्या पार्श्वभुमीवर शासकीय यंत्रणा कामाला लागली आहे. शहरातील दुपारून ज्या मतदान केंद्रांवर मतदारांची गर्दी होते, अश्या 30 मतदान केंद्रांवर निवडणूक आयोगातर्फे वेब कॉस्टींग कॅमेरे लावले जात आहे. या कॅमेर्‍यांच्या माध्यमातून निवडणूक आयोग कार्यालय व निवडणूक निर्णय अधिकारी जितेंद्र पाटील हे त्यांच्या कार्यालयात बसून त्या मतदान केंद्रावरील परिस्थितीवर लक्ष ठेवता येणार आहे, गुरूवारी पु.ओं.नाहाटा महाविद्यालयात निवडणुकीशी संबंधित कर्मचार्‍यांना मतदान यंत्रे हाताळणीचे प्रात्यक्षित दिले. कर्मचार्‍यांनी सुध्दा सर्व माहिती समजून घेतली.
शहरात तापला आखाडा
पालिका निवडणूकीची रणधुमाळी सुरू झाली आहे. राजकारण तापू लागले आहे. त्यातच प्रशासकीय यंत्रणा सुध्दा अ‍ॅक्शन मोडवर आली आहे. गुरूवारी शहरातील नहाटा कॉलेज, ताप्ती पब्लिक शाळेत निवडणूकीतील कर्मचार्‍यांसाठी प्रशिक्षण वर्गाचे आयोजन केले होते. सकाळी 10 वाजेपासून प्रशिक्षण वर्गाला सुरूवात झाली. यात निवडणूकीशी असलेले फॉर्म भरणे, संबंधित फॉर्म कोणत्या पाकीटात ठेवणे याची माहिती देण्यात आली, मशीनला काही अडचण आली तर कोणीही घाबरून जाऊ नये, वरिष्ठांना माहिती द्यावी, अश्या सूचना यावेळी निवडणूक निर्णय अधिकारी यांनी दिल्यात.
पोलिसांचा असेल चोख बंदोबस्त
यावेळी कर्मचार्‍यांना गेल्या निवडणुकीत काही अडचणी आल्या होत्या का, याची माहिती घेत त्या शंका दूर केल्यात. मतदानाच्या पूर्वी एकतास अगोदर मॉकड्रील घ्यावे अश्या सूचना केल्यात. पालिका निवडणूकीसाठी शहरात 191 मतदान केंद्रे आहे. या मतदान केंद्रावर पोलिसांचा बंदोस्त चोख राहणार आहे. यामुळे मतदान शिस्तीत करायचे आहे, मतदान केद्राच्या आत कोणालाही मोबाईल आणू द्यायचा नाही, अश्या सक्त सूचना केल्यात.
ओळखपत्राशिवाय मतदान नाही
प्रशिक्षण वर्गात माहिती देतांना नायब तहसीलदार संतोष विनंते यांनी सांगितले की, निवडणूक आयोगाने ठरवून दिलेल्या ओळखपत्राशिवाय कोणालाही मतदान करू द्यायचे नाही, कुठले तरी एक ओळखपत्र त्या मतदाराजवळ पाहीजेच त्यामुळे मतदान कक्षात येणार्‍या मतदाराचे मतदान कार्ड, पॅनकार्ड, वाहन परवाना, पासपोर्ट आदी ठरवून दिलेली ओळखपत्रे पाहूनच त्यांना मतदान करू द्यावे, प्रत्येक बुथवरील मतदानाची आकडेवारी ही दर दोन तासांनी तहसील कार्यालयात कळवायची आहे, अश्या सक्त सूचना केल्यात.
या केंद्रांवर राहणार वेबकॉस्टींग कॅमेरे
पालिका निवडणूकीच्या पार्श्वभुमीवर शहरातील डीएस हायस्कूल, शहरातील जुना सातारा भागातील पालिका शाळा क्रमांक 2, खळवाडीतील भालचंद्र धोंडू पाटील प्राथमिक विद्यालय,रेल्वे हॉस्पीटलजवळील महिला सेवा समाज समिती संस्कृती इंग्लीश प्रायमरी स्कूल,रेल्वे नॉर्थ कॉलनी विद्या मंदिर, श्री संत गाडगे महाराज हिंदी विदयालय आणि कनिष्ठ महाविद्यालय,रेल्वे नॉर्थ कॉलनी, जळगाव रोडवरील पालिकेची शाळा नंबर 29, खळवाडीतील दादासाहेब रामदास गणपत झांबरे माध्यमिक विद्यालय (भुसावळ हायस्कूल), खडका रोडवरील एमआय तेली इंग्लीश मिडीयम स्कूल,दिनदयाल नगरातील पालिका प्राथमिक शाळा नंबर 35 या शाळांमध्ये वेबकॉस्टींग केले जाणार आहे.
शनिवार, रविवारी पोस्टल मतदान होणार
पालिका निवडणूकीसाठी जे कर्मचारी डयुटीवर राहणार आहेत अश्या कर्मचार्‍यांसाठी येथील प्रांताथिकारी कार्यालयात शनिवार, 29 रविवार, 30 रोजी असे दोन दिवस येथे कर्मचार्‍यांना मतदान करता येणार आहे. मतदारांना मतपत्रिका देऊन त्यांना त्यांना पाहीजे त्या उमेदवारावर खुण करायची आहे, नंतर ती मतपत्रिका ही पाकीटात टाकून चिकटवून बंद करायची आहे, आणि तेथे असलेल्या बॉक्समध्ये ते पाकीट टाकायचे आहे. सुमारे 400 ते 500 कर्मचारी मतदानासाठी असतील. असे निवडणूक यंत्रणेकडून सांगण्यात आले.
