मुक्ताईनगरात आमदार एकनाथराव खडसे म्हणाले, परिवाराचा विषय आल्याने आता निवडणूक रिंगणात
मुक्ताईनगर (29 नोव्हेंबर 2025) : मुक्ताईनगर नगरपंचायत निवडणुकीत राष्ट्रवादीचा उमेदवार नसल्याने आपण प्रचार केला नाही वा कुणाशीही संपर्क केला नाही मात्र दोन दिवसांपूर्वी आमदार चंद्रकांत पाटील यांनी ही लढाई शिवसेना भाजपाची नाही तर शिवसेना विरोधात खडसे परिवाराची लढाई असल्याचे सांगितले त्यामुळे खडसे परिवाराचा घटक म्हणून निवडणुकीत उतरणे स्वाभाविक आहे व तीन दिवसात आपण निवडणुकीतील ताकद दाखवून देवू, असा विश्वास माजी मंत्री आमदार एकनाथराव खडसे यांनी माध्यमांशी बोलताना व्यक्त केला.
विकासासाठी निधी आणला मात्र विरोधकांनी त्यावर ‘स्टे’ आणला
आमदार चंद्रकांत पाटील यांना आपण काही प्रश्न विचारणार असून त्याचे त्यांनी उत्तर द्यावे, असेही आमदार खडसे म्हणाले. मुक्ताईनगर नगरपरिषद मीच निर्माण केली असा दावा त्यांनी करीत विकासासाठी मोठ्या प्रमाणावर पैसा आणला मात्र आमदारांनी त्याला ‘स्टे’ आणल्याचा आरोप त्यांनी केला. खडसे म्हणाले की, मूलभूत सुविधांसाठी दहा कोटी दिल्यानंतर उपमुख्यमंत्री एकनाथ शिंदे यांच्याकडून तुम्ही ‘स्टे’ का आणला? नाथाभाऊंनी मुक्ताई मंदिराच्या कामाला सुरूवात केली मात्र मूळ मंदिरासाठी एक रुपया तरी सात वर्षात दिला का ? असा प्रश्न त्यांनी केला.
