भुसावळातील प्रभाग एकमधील साईचंद्र नगरातील रिटेनिंग वॉलचा प्रश्न मार्गी लावणार : अमोल इंगळे यांची ग्वाही
भुसावळात शिंदे गटाचे उमेदवार अमोल इंगळे व ज्योती सोयंके यांचा प्रभाग क्रमांक एकमधील प्रचार दौर्‍याला प्रतिसाद
भुसावळ (29 नोव्हेंबर 2025) : भुसावळ शहरातील प्रभाग एकमधील साईचंद्र नगरात दोन वर्षांपूर्वी पावसाळ्यात रिटेनिंग वॉल कोसळली होती मात्र अद्यापही ही रिटेनिंग वॉल उभारण्यात आलेली नाही मात्र निवडणुकीत संधी मिळाल्यानंतर प्रथम प्राधान्याने पालिकेच्या माध्यमातून ही रिटेनिंग वॉल उभारण्यासाठी आपण प्रयत्न करणार असल्याची ग्वाही प्रभाग क्रमांक एकमधील शिवसेना एकनाथ शिंदे गटाचे उमेदवार व माजी नगरसेवक अमोल इंगळे यांच्यासह ज्योती लक्ष्मण सोयंके यांनी दिली.
मूलभूत सोयी-सुविधांना प्राधान्य
शिंदे गटातील दोन्ही उमेदवारांनी प्रभाग क्रमांक एकमध्ये प्रचारात वेग घेतला आहे. या पार्श्वभूमीवर दोन्ही उमेदवारांशीं ‘ब्रेकिंग महाराष्ट्र’ने संवाद साधला असता ते म्हणाले की, यावल रोडवरील साईचंद्र नगरातील रिटेनिंग वॉल दोन वर्षांपूर्वी पावसाळ्यात कोसळली मात्र अद्यापही पालिकेने रिटेनिंग वॉल उभारलेली नाही मात्र मतदारांनी संधी दिल्यानंतर या रिटेनिंग वॉलचे काम प्रथम प्राधान्याने करण्यासाठी आपण पालिकेकडे निश्चितपणे पाठपुरावा करू, अशी ग्वाही यावेळी उमेदवारांनी दिली.
रस्ते, पथदिवे, स्वच्छतेला प्राधान्य
दोन्ही उमेदवारांनी सांगितले की, नागरिकांच्या रस्ते, पाणी, स्वच्छता व पथदिवे या निकडीच्या गरजा असून या समस्या सोडवण्यास आमचे प्राधान्य असेल. दररोज वॉर्डात घंटागाडी येण्यासह ज्या भागात पथदिवे नाहीत अथवा बंद आहेत ते सुरू करण्यात येतील तसेच ज्या भागात पेव्हर ब्लॉक, बाकडे तसेच रस्त्यांची आवश्यकता असेल तेथे ही कामे होण्यासाठी पालिकेकडे निश्चितपणे पाठपुरावा करण्यात येईल.
डोअर टू डोअर भेटीत प्रभागाचा चेहरा-मोहरा बदलण्याची ग्वाही
शिंदे गटाचे उमेदवार अमोल इंगळे व ज्योती सोयंके यांनी मतदारांनी संधी दिल्यास निश्चितपणे नागरिकांच्या समस्या सोडवू, अशी ग्वाही दिली आहे शिवाय निश्चितपणे आम्हाला या निवडणुकीत यश मिळेल यात कोणतीही शंका नसल्याचे सांगितले आहे. दोन्ही उमेदवारांच्या प्रचार रॅली झाल्यानंतर त्यांनी आता थेट मतदारांच्या दारी जावून भेटी-गाठी सुरू केल्या आहेत. प्रचार दौर्‍याला उत्स्फूर्तपणे प्रतिसाद लाभत आहे.
