निवडणूक मतदानदिनी तालुका न्यायालयांना स्थानिक सुट्टी : 2 डिसेंबरला 13 तालुक्यांतील न्यायालये बंद
भुसावळ (29 नोव्हेंबर 2025) : नगरपालिका व नगरपंचायतींच्या सार्वत्रिक निवडणुकीच्या मतदानाच्या पार्श्वभूमीवर जळगाव जिल्हा व सत्र न्यायालयाने मंगळवार, 2 डिसेंबर रोजी तालुका पातळीवरील न्यायालयांना स्थानिक सुट्टी जाहीर केली आहे. या आदेशानुसार चाळीसगाव, पाचोरा, भडगाव, भुसावळ, यावल, रावेर, मुक्ताईनगर, जामनेर, अमळनेर, चोपडा, धरणगाव, एरंडोल आणि पारोळा येथील न्यायालये व कार्यालये या दिवशी पूर्णपणे बंद राहणार आहेत.
दरम्यान, बोदवड न्यायालय, तसेच जळगाव जिल्हा न्यायालय आणि मुख्यालयातील सर्व अपिलीय, दिवाणी व फौजदारी न्यायालये नियमित सुरू राहतील, अशी माहिती न्यायालय प्रशासनाकडून देण्यात आली.
उच्च न्यायालयानुसार निर्णय
निवडणूक कामकाज व्यवस्थितपणे पार पाडता यावे, यासाठी हा निर्णय घेण्यात आला असून, सुट्टीची भरपाई म्हणून दि.27 डिसेंबर (चौथा शनिवार) रोजी बोदवड न्यायालय व जिल्हा न्यायालय, जळगाव वगळता अन्य सर्व तालुका न्यायालये व कार्यालये सुरू राहतील. संबंधितांनी याची नोंद घ्यावी, असे आवाहन करण्यात आले आहे. महाराष्ट्र शासनाच्या सामान्य प्रशासन विभागाच्या अधिसूचना आणि उच्च न्यायालयाच्या निर्देशानुसार हा निर्णय घेतला आहे.
