भुसावळ शहरात पोलिसांकडून विविध भागात नाकाबंदी : एका एका पॉइंटवर 20 कर्मचारी तैनात
भुसावळ (29 नोव्हेंबर 2025) : भुसावळ पालिका निवडणुकीच्या पार्श्वभूमीवर पोलिसांकडून शहरात विविध भागात नाकाबंदी केली आहे, पालिका बंदोबस्तासाठी आलेले होमगार्ड, पोलिस यांना नाकाबंदीच्या ठीकाणी तैनात केले आहे. एका – एका पॉइंटवर 20 कर्मचारी वाहनांची कसून तपासणी करीत आहे. रस्त्याने येणार्‍या जाणार्‍या वाहनांना थांबवून तपासणी होत आहे. यामुळे वाहनधारकांमध्ये भितीचे वातावरण निर्माण झाले आहे.
शहरात ठिकठिकाणी नाकाबंदी
पालिका निवडणुकीमुळे पोलिस प्रशासन अर्लट आहे. मतदान तीन दिवसांवर आले असल्याने कुठलाही गैरप्रकार होऊ नये यासाठी पोलिसांनी आता दररोज शहरातील विविध भागात नाकाबंदी सुरू केली आहे. शुक्रवारी शहरातील वसंत टॉकीज, यावल नाका, जळगाव वाय पाईंट, तसेच बसस्थानक, नहाटा चौफुली, रजा टॉवर, जामनेर रोड येथे एकाच वेळी नाकाबंदी लावण्यात आली. यामुळे पोलिसांना पाहून वाहनधारक त्यांचा मार्ग बदल करून घेत होते. संध्याकाळी 6 ते रात्री 9 वाजेपर्यत नाकाबंदी लावली होती.
दररोज होतेय नाकाबंदी
डीवायएसपी संदीप गावीत यांच्या मार्गदर्शनाखाली शहर निरीक्षक उध्दव डमाळे, बाजारपेठ निरीक्षक राहुल वाघ यांनी नाकाबंदीचे नेतृत्व केले. यावेळी विना परवाना वाहन चालविणे, विना क्रमांकाची गाडी चालविणे, गाडीचे कागदपत्रे नसणे, तीन सीट अश्या विविध कलमांन्वये पोलिसांकडून कारवाई केली जात होती. यामुळे पोलिसांच्या कारवाई मुळे पालिका निवडणूकीच्या दरम्यान कुठलाही अनुचितप्रकार घडू नये म्हणून दक्षता घेतली जात आहे. शहरात दररोज नाकाबंदी लावण्यात येणार आहे, असे डीवायएसपी गावीत यांनी सांगितले.
