भुसावळ (30 नोव्हेंबर 2025) : भुसावळ नगरपालिका निवडणुकीच्या पार्श्वभूमीवर कायदा-सुव्यवस्था अबाधीत राखण्यासाठी शहरातील 15 जणांच्या शहरबंदीचे आदेश लवकरच निघणार आहे. 1 ते 3 डिसेंबर दरम्यान ही कारवाई लागू राहणार असल्याची माहिती डीवायएसपी संदीप गावीत यांनी दिली.
उपद्रवी पोलिसांच्या रडारवर
नगरपालिका निवडणुका असल्याने पोलिसांनी दक्षतेच्या दृष्टीने उपद्रवी आणि जे गेल्या निवडणुकीत पोलिसांनी त्यांच्यावर कारवाई केली आहे, अश्या 15 जणांच्या शहरबंदीचे प्रस्ताव पोलिस ठाण्यांकडून अपर पोलिस अधीक्षक कार्यालयात पाठविण्यात आले आहे. 1 ते 3 डिसेंबर या कालावधीत मतदान आणि मतमोजणीच्या दिवशी शहरात प्रवेशावर निर्बंध राहणार असून, ज्यांना मतदान करायचे आहे त्यांना फक्त मतदानासाठी शहरात येण्यास आणि मतदानानंतर त्वरित बाहेर जाण्याची परवानगी असेल.
या काळात शहरात अनावश्यक वावर, गर्दी, तसेच गैरप्रकार रोखण्यासाठी पोलिसांकडून कडक नियंत्रण ठेवण्यात आले आहे. डीवायएसपी गावीत यांनी सांगितले की, निवडणूक शांततेत व्हावी, कोणताही अनुचित प्रकार घडू नये आणि नागरिकांनी निर्धास्तपणे मतदान करावे यासाठी ही प्रतिबंधात्मक उपाययोजना राबविण्यात येत आहे. शहराच्या सर्व प्रवेशद्वारांवर नाकाबंदी, तपासणी पथके आणि सतत गस्त सुरू असेल.
