भुसावळ (30 नोव्हेंबर 2025) : भुसावळ नगरपालिका निवडणुकीची प्रक्रिया प्रशासनाकडून वेगात राबविण्यात येत आहे. शुक्रवार, 28 रोजी तहसील कार्यालयााच्या आवारातील स्टाँगरूममध्ये मतदानासाठी लागणारे मतदान यंत्रे सिलींगचे काम करण्यात आले. सकाळी नऊ वाजेपासून सिलींगची प्रक्रीया 140 कर्मचार्‍यांनी पार पाडली. यावेळी यंत्रणेने 420 मतदान यंत्रे सिलिंग केली. निवडणूक निर्णय अधिकारी जितेंद्र पाटील हे सिलिंगच्या ठिकाणी थांबून होते.
1 रोजी आटोपणार प्रचाराचा धुराळा
नगरपालिका निवडणुकीच्या पार्श्वभुमीवर महसूल व पालिका यंत्रणा कामाला लागली आहे. उमेदवारांची माघारी होऊन चिन्ह वाटप झाल्याने आता उमेदवार व त्याच्या समर्थकांचा प्रचाराचा धुराळा उडत आहे. राजकीय वातावरण तापत असतांनाच शासकीय यंत्रणा सुध्दा कामाला लागली आहे.
शुक्रवारी तहसील कार्यालयाच्या आवारातील स्टाँग रूममध्ये मतदानासाठी लागणारे ईव्हीएम मशीन सिलींग करण्याचे काम करण्यात आलेा. यावेळी काही उमेदवार प्रत्यक्ष आले होते, नंतर ते निघून गेले. दोन दिवसांपूर्वी सर्व मशीन मतदान क्रेंद्र निहाय लावण्यात आले. शुक्रवारी सकाळी 9 वाजेपासूनच मतदान यंत्रे सिलींग करण्याचे कामाला सुरूवात झाली, यासाठी येथे 20 टेबल लावण्यात आले होते. या कामासाठी 100 कर्मचार्‍यांची नियु्क्ती होती तर मतदान यंत्रे ने-आण करण्यासाठी 40 जण असे सुमारे 140 कर्मचारी सिलींग प्रक्रीयेत गुंतले होते. दिवसभर मतदान यंत्रांचे सिलींग करण्याचे काम सुरू झाले होते. यावेळी सहायक अधिकारी तथा राजेद्र फातले व त्यांचे पालिकेचे अधिकारी, कर्मचारी सुध्दा येथे नियुक्त होते.
150 पेक्षा जास्त कर्मचार्‍यांचे जेवण
तहसील कार्यालयाच्या आवारात शुक्रवारी मतदान यंत्रे सिलींग करण्याचे कामासाठी आलेल्या कर्मचार्‍यांना सकाळी चहा, नाश्ता, दुपारी जेवण, दुपारी चहा, रात्री जेवण असे 150 पेक्षा जास्त जणांची व्यवस्था तेथे करण्यात आली होती. यामुळे टप्याटप्याने कर्मचार्‍यांनी जेवण करून पुन्हा मतदान यंत्रे सिलींग करण्याचे काम कर्मचार्‍यांनी केले. रात्री उशीरापर्यत सिलींग करण्याचे काम सुरू होते. एकाच दिवसात मतदानासाठी लागणारे मतदान यंत्रे मतदारांची नावाच्या मतपत्रिका टाकून सिलींग करण्यात आले आहे.
निवडणूक निरीक्षक यांच्याकडून पहाणी
मतदान यंत्रे सिलींग करण्याच्या वेळेस निवडणूक निरीक्षक बाबासाहेब पारधी यांनी मतदान यंत्रे सिलींग करण्याच्या ठीकाणी भेट देऊन प्रत्यक्ष पहाणी केली. यावेळी किती मशीन लागणार आहे, याची माहिती घेतली. यावेळी सिलींगच्या दृष्टीने त्यांनी कर्मचार्‍यांना सूचना केल्यात. यावेळी निवडणूक निरीक्षक पारधी यांनी शहरातील रेल्वे नॉर्थ कॉलनी, रेल्वे स्कूल व संत गाडगेबाबा ईजिनिअरींग महाविद्यालयातील मतदान केंद्रांना भेटी देऊन तेथील मतदान केद्रांची पहाणी केली. यावेळी त्याच्या समवेत निवडणूक निर्णय अधिकारी जितेद्र पाटील, महेश चौधरी, वैभव पवार, पंकज मदने आदी उपस्थित होते.
सोमवारी साहित्य वितरण होणार
सोमवार, 1 डिसेंबर रोजी नगरपालिका निवडणुकीच्या पार्श्वभुमीवर मतदान केंद्रावर जाणार्‍या कर्मचार्‍यांना मतदान यंत्रे व आवश्यक सामुग्री येथील तहसील कार्यालयाच्या आवारातून दिली जातील. सकाळी 10 वाजेपासूनच मतदान साहित्य दिले जाणार आहे. प्रत्येक बुथनिहाय कर्मचार्‍यांना मतदान साहित्याचे वितरण होईल. यावेळी कुठल्या स्टॉलवरून कोणते फॉर्म घ्यायचे आहे, कुठे मतदान यंत्रे दिली जातील, याचे नियोजन निवडणूक निर्णय अधिकारी पाटील यांनी केले आहे. त्यादृष्टीने त्यांनी यासाठी स्वतंत्र पथके तयार केले आहे.
