भुसावळ (30 नोव्हेंबर 2025) : भुसावळ नगरपालिका निवडणुकीच्या पार्श्वभूमीवर शहरातील शासकीय कर्मचारी, पोलीस, होमगार्ड आणि निवडणूक प्रक्रियेत प्रत्यक्ष गुंतलेले अधिकारी-कर्मचारी यांचे मतदान वाया जाऊ नये, यासाठी प्रांताधिकारी कार्यालयात शनिवार, 29 राोजी पोस्टल मतदान प्रक्रिया राबवण्यात आली. पहिल्या दिवशी शनिवारी 305 जणांनी हक्क बजावल्याने 52 टक्के मतदान झाले तर रविवार, 30 रोजी देखील ही प्रक्रिया सुरू राहणार आहे.
सकाळपासून मतदानाला प्रारंभ
शनिवारी सकाळी दहापासून मतदानास प्रारंभ झाला. सर्वप्रथम कागदपत्रांची पडताळणी करून संबंधित कर्मचार्‍यांना पोस्टल बॅलेट देण्यात आले. मतदान केंद्रावर सीसीटीव्ही निरीक्षण, स्वतंत्र मदत कक्ष, दिव्यांग कर्मचार्‍यांसाठी सुविधा आणि शांततेत मतदान व्हावे यासाठी प्रांताधिकारी कार्यालयाकडून विशेष व्यवस्था करण्यात आली. प्रांताधिकारी कार्यालयातील एका कक्षात मतदान केंद्र करण्यात आले होते. तेथे सकाळी ज्या कर्मचार्‍यांना मतदान प्रक्रीयेच्या ऑर्डर आलेल्या आहे, त्या कर्मचार्‍यांनी पोस्टल मतदानासाठी निवडणूक निर्णय अधिकारी यांच्याकडे अर्ज भरून दिले होते. ज्या कर्मचार्‍यांनी मतदानासाठी अर्ज भरून दिले होते, त्या कर्मचार्‍यांनी मतदान करण्यासाठी गर्दी केली होती. पोस्टल बॅलेटची सोय मुख्यत्वे अशा कर्मचार्‍यांसाठी आहे, जे निवडणुकीच्या दिवशी विविध मतदान केंद्रांवर ड्युटीवर राहणार आहेत. या उपाययोजनेमुळे त्यांचे लोकशाही हक्क अबाधित राहतील, असे प्रांताधिकारी कार्यालयाने सांगितले.
रविवारीदेखील मतदान प्रक्रिया
रविवार, 30 रोजीदेखील सकाळी दहा ते संध्याकाळी सहापर्यंत पोस्टल मतदान प्रक्रिया सुरू असेल. प्रशासनाने सर्व संबंधितांना दिलेल्या वेळेत उपस्थित राहण्याचे आवाहन केले आहे. शनिवारी सकाळी प्रांताधिकारी कार्यालयातील मतदान केंद्रांच्या बाहेर मतदार कर्मचार्‍यांची रांग लागली होती. यावेळी मतदारांना त्यांचे ओळखपत्र दाखवून मतदान कक्षात सोडण्यात आले.
कर्मचार्‍यांना बैठकीत दिल्या सूचना
निवडणुकीत जे कर्मचारी सामील झाले आहे, जे मतदान साहित्यांची वाटप व परत स्विकारणार आहे, त्या कर्मचार्‍यांच्या बैठकीचे आयोजन शनिवारी निवडणूक निर्णय अधिकारी तथा प्रांताधिकारी जितेंद्र पाटील यांनी केले होते. यावेळी प्रांताधिकारी कार्यालयात झालेल्या बैठकीत सूचना देतांना जितेंद्र पाटील यांनी सांगितले की, सोमवारी एक तारखेला मतदान केंद्रांवरील कर्मचार्‍यांना साहित्य देतांना त्यांना नीट काळजीपूर्वक साहित्य द्यावे, सर्व प्रकारचे फॉर्म, त्यासाठी लागणारे पाकीटे हे निट मतदान केद्र निहाय द्यावे, तसेच मतदान यंत्रे देतांना घेतांना नीट घ्यावी, कुठेही गर्दी गोंधळ होणार नाही, याची काळजी घ्यावी. अश्या सूचना निवडणूक निर्णय अधिकारी पाटील यांनी दिल्यात.
खर्च सादर करणार्‍यांची गर्दी
भुसावळ प्रांताधिकारी कार्यालयात उमेदवार आणि त्यांचे सहकारी हे उमेदवारांचा दैनंदिन खर्च सादर करण्यासाठी गर्दी करीत आहे. दररोज येथील प्रांत कार्यालयात गर्दी होत आहे. उमेदवारांनी दैनंदिन खर्च सादर केला नाही तर निवडणूक यंत्रणेकडून त्यांना कारणे दाखवा नोटीस दिली जाते. यामुळे नसती झंझट नको म्हणून दररोज खर्च सादर करण्यासाठी प्रांताधिकारी कार्यालयात सकाळी 11 वाजेपासून संध्याकापर्यत गर्दी राहात आहे.
