Planes grounded, passengers stranded : Orders to provide immediate refunds to passengers मुंबई (7 डिसेंबर 2025) : गेल्या चार दिवसांपासून इंडिगोची सुमारे दोन हजाराहून अधिक विमाने रद्द करावी लागल्याने प्रवासी सैरभैर झाले आहेत. रद्द केलेल्या किंवा विस्कळीत उड्डाणांशी संबंधित सर्व परतफेड रविवार, 7 डिसेंबर रोजी रात्री 8 वाजेपर्यंत पूर्ण करण्याची अंतिम मुदत
नागरी उड्डाण मंत्रालयाने इंडिगोला दिली आहे..
मंत्रालयाने विमान कंपन्यांना स्पष्टपणे निर्देश दिले आहेत की ज्या प्रवाशांच्या प्रवासावर उड्डाण रद्द झाल्यामुळे परिणाम झाला आहे त्यांच्याकडून कोणतेही शुल्क आकारू नये. आदेशाचे पालन न केल्यास तत्काळ नियामक कारवाई देखील केली जाईल.
स्पेशल पॅसेंजर सपोर्ट अॅण्ड रिफंड सेल
उड्डाण व्यत्ययानंतर प्रवाशांच्या तक्रारींचे त्वरित निराकरण सुनिश्चित करण्यासाठी, मंत्रालयाने इंडिगोला एक विशेष पॅसेंजर सपोर्ट आणि रिफंड सेल स्थापन करण्याचे निर्देश दिले आहेत. हा कक्ष वारंवार पाठपुरावा न करता परतफेड आणि पर्यायी प्रवास व्यवस्था पूर्ण करण्यासाठी प्रभावित प्रवाशांशी वैयक्तिकरित्या संपर्क साधेल. कामकाज पूर्णपणे सामान्य होईपर्यंत स्वयंचलित रिफंड प्रणाली चालू राहील.
सामान परत करण्यासाठी 48 तासांची अंतिम मुदत
मंत्रालयाने इंडिगोला रद्द किंवा विलंबामुळे हरवलेले सर्व सामान शोधून ते प्रवाशांच्या घरी किंवा दिलेल्या पत्त्यावर 48 तासांच्या आत पोहोचवण्याचे निर्देश दिले आहेत. प्रवाशांना सामानाची स्थिती, ट्रॅकिंग आणि डिलिव्हरीच्या वेळेबाबत स्पष्ट माहिती देण्याचे निर्देश विमान कंपन्यांना देण्यात आले आहेत. आवश्यक असल्यास नियमांनुसार भरपाई देखील दिली जाणार आहे.
