बालनाट्य लेखक ज्ञानेश्वर गायकवाड यांच्या संहितांचे उद्या पुस्तक प्रकाशन

जळगाव (7 डिसेंबर 2025) : शहरासह महाराष्ट्रातील विविध शहरात बालनाट्य चळवळ रुजवत ती बहरत ठेवण्याचे कार्य गेल्या 48 वर्षांपासून करणारे रंगकर्मी, बालनाट्य लेखक – दिग्दर्शक ज्ञानेश्वर गायकवाड यांच्या निवडक बालनाट्य संहितांचे प्रकाशन सोमवार, 8 सायंकाळी 6 वाजता भैय्यासाहेब गंधे सभागृहात ज्येष्ठ अभिनेते पुष्कर श्रोत्री व मान्यवरांच्या उपस्थितीत करण्यात येणार आहे.

45 हून अधिक बालनाट्य व 1 दोन अंकी बालनाट्य लिहणार्‍या ज्ञानेश्वर गायकवाड यांनी बालनाट्याच्या माध्यमातून बालकांचे भावविश्व फुलवण्याचे कार्य केले आहे. त्यांनी लिहिलेल्या बालनाट्यातून अभिनय साकारलेले बालकलावंत आज चित्रपट व व्यावसायिक रंगभूमीवर कार्यरत असून, त्यांचे लेखन अधिकाधिक बालनाट्य संस्था व दिग्दर्शकांपर्यंत पोहचण्यासाठी त्यांच्या निवडक संहितांचे प्रकाशन शहरातील श्रेयस प्रकाशनातर्फे करण्यात येत आहे.