LIC officer burned alive : The shocking reason has come to light नवी दिल्ली (20 जानेवारी 2026) एलआयसीतील वरिष्ठ अधिकार्याचा कार्यालयात आग लागून मृत्यू झाला होता मात्र हा मृत्यू आगीमुळे नव्हे तर पेट्रोल टाकून जिवंत जाळल्यानेच झाल्याचा निष्कर्ष तमिळनाडू पोलिसांनी मदुरै येथील घटनेबाबत काढला आहे. मृत अधिकारी कल्याणी नांबी (54) यांना पेट्रोल ओतून जाळल्याप्रकरणी त्यांचा सहकारी टी. राम याला अटक करण्यात आली आहे. सुरुवातीला ही घटना एसीच्या शॉर्ट-सर्किटमुळे झालेला एक अपघात असल्याचं मानले जात होत.
कॅबिनमध्ये पेट्रोल टाकून लावली आग
आरोपी रामने कल्याणी नांबी यांच्या केबिनमध्ये पेट्रोल ओतलं आणि आग लावली. पोलिसांनी दिलेल्या माहितीनुसार, कल्याणी यांनी विमा दाव्यांच्या सेटलमेंटमध्ये सुरू असलेले गैरप्रकार आणि अनियमितता उघडकीस आणली होती. त्या राम विरुद्ध शिस्तभंगविषयक कारवाईची शिफारस करणार होत्या. याच रागातून आरोपीने हे टोकाचं पाऊल उचललं. कल्याणी नांबी यांची काही दिवसांपूर्वीच तिरुनेलवेली येथून मदुरै येथे बदली झाली होती.
आईने मुलाला केला होता फोन
मदुरै येथील एलआयसी कार्यालयात ही घटना घडली. सुरुवातीला ही आग अपघाती वाटली होती परंतु जेव्हा मृत महिलेच्या मुलाने पोलिसांत तक्रार दाखल केली, तेव्हा संशय बळावला. घटनेच्या काही मिनिटं आधी आईने फोन करून घाबरलेल्या आवाजात पोलिसांना कळवण्यास सांगितलं होतं, असं मुलाने तक्रारीत नमूद केलं होतं.
आरोपीच्या जबाबात तफावत
आरोपी राम हा देखील या आगीत किरकोळ भाजला होता, ज्याला त्याने ‘अपघात’ असं नाव दिलं होते मात्र चौकशीदरम्यान त्याने वारंवार विसंगत विधानं केल्यामुळे पोलिसांना संशय आला. सखोल तपासानंतर पोलिसांनी अखेर हत्येचा गुन्हा दाखल केला. एका वरिष्ठ पोलीस अधिकार्याने सांगितले की, कल्याणी नांबी यांनी अलीकडेच विमा दाव्यांमधील अनियमिततेबाबत तक्रार केली होती आणि राम याच्यावर कारवाई करण्याची भूमिका घेतली होती, जे या हत्येचे मुख्य कारण ठरलं आहे.
