जळगाव (23जानेवारी 2026) : आजारापुढे हात टेक 34 वर्षीय तरुणाने घरात कुणीही नसताना गळफास घेऊन आपली जीवनयात्रा संपवली. गणेश समाधान अहिरे (34, रा.जुने जळगाव) असे मृताचे नाव आहे.
आजाराला कंटाळून उचलले पाऊल
गणेश अहिरे हा आपल्या आईसोबत जुने जळगाव भागात राहत होता. तो गेल्या काही दिवसांपासून गंभीर आजारी असल्याने शारीरिक आणि मानसिक त्रासात होता.
शुक्रवार, 23 रोजी त्याची आई काही कामासाठी घराबाहेर गेल्यानंतर घरात कुणीही नसताना गणेशने टोकाचे पाऊल उचलले. आई जेव्हा बाहेरून घरी परतली, तेव्हा तिला मुलगा बेशुद्ध अवस्थेत दिसून आला. हा प्रकार पाहून त्यांनी हंबरडा फोडला.
तत्काळ परिसरातील नागरिकांनी मदतीसाठी धाव घेतली आणि गणेशला तातडीने शासकीय वैद्यकीय महाविद्यालय व रुग्णालयात (जीएमसी) दाखल केले मात्र डॉक्टरांनी तपासणीअंती त्याला ‘मृत’ घोषित केले.
या घटनेची माहिती मिळताच पोलिसांनी घटनास्थळी धाव घेतली. याप्रकरणी शनिपेठ पोलिसात अकस्मात मृत्यूची नोंद करण्यात आली. आजारपणाला कंटाळूनच त्याने हे पाऊल उचलले असावे, असा प्राथमिक अंदाज नातेवाईकांकडून वर्तवण्यात येत आहे. गणेशच्या जाण्याने त्याच्या वृद्ध आईवर दुःखाचा डोंगर कोसळला आहे.
