जळगाव (23जानेवारी 2026) : भरधाव कार महामार्गावरील दुभाजक तोडून थेट विरुद्ध दिशेने येणार्या कंटेनरवर आदळून झालेल्या अपघातात भुसावळातील तरुणीचा मृत्यू झाला. हा अपघात नशिराबादजवळील टोल नाक्याजवळ गुरुवार, 22 रोजी रात्री 8.30 वाजता घडला. या अपघातात कार चालक गंभीर जखमी झाला असून त्याच्यावर गोदावरी फाउंडेशनचे रुग्णालयात उपचार सुरू आहे.
नियंत्रण सुटल्याने अपघात
जळगावकडून भुसावळकडे जाणारी इनोव्हा कार (एम.एच.19, बी.यू.7186) चा गुरुवारी रात्री 8.30 च्या सुमारास जळगाव ते भुसावळ महामार्गावरील नशिराबादजवळ भीषण अपघात झाला. चालकाचा ताबा सुटल्याने इनोव्हा कारने महामार्गावरील डिव्हायडर तोडत थेट विरुद्ध दिशेने जाऊन समोरून येणार्या कंटेनर (जी.जे.01 डी.एक्स.9497) ला जबर धडक दिली. या भीषण अपघातात इनोव्हा कारमधील झोया नदीम पठाण (22) या तरुणीचा मृत्यू झाला.
या अपघातात भुसावळातील सोना डेअरीचे संचालक यांचा मुलगा अरबाज खान (26) हा गंभीर जखमी झाला. गंभीर जखमी असलेल्या अरबान खान यास तातडीने उपचारार्थ गोदावरी रुग्णालयात दाखल करण्यात आले आहे. दरम्यान, हा अपघात इतका जबर होता की, यात इनोव्हा कारचा पुढील भागाचा पूर्णपणे चुराडा झाला.
अपघातामुळे महामार्गावरील वाहतूक काही काळ विस्कळीत झाली होती. अपघातानंतर पोलीस व आपत्कालीन सेवांचे पथक घटनास्थळी दाखल झाले. अपघाताचा तपास नशिराबाद पोलीस करत आहेत.
