लाडका नगरसेवक योजनेवरुन भुसावळ पालिका सभेत गदारोळ : सत्ताधार्‍यांकडून 250 विषयांना मंजुरी

Uproar in the Bhusawal municipal council meeting over the ‘Favorite Corporator’ scheme: The ruling party approves 250 proposals भुसावळ (3 फेब्रुवारी 2026) : नगरपालिकेत सत्तांतरण झाल्यानंतर पालिकेची पहिली सर्वसाधारण सभा मंगळवार, 3 फेब्रुवारी रोजी  सकाळी 11 वाजता नगरपालिकेतील वरच्या मजल्यावर झाली. सुरूवातीला खेळीमेळीच्या वातावरणात सुरू झालेल्या सभेनंतर भाजपा विरोधकांनी अजेंड्यावर 250 पैकी शंभरावर विषयांना विरोध दर्शवला तर विरोधाचे पत्रही नगराध्यक्षांना देण्यात आले. विषय क्रमांक 28 ते 69 हे एकाच प्रभाग क्रमांक दोनमधील असल्याने भाजपा गटनेता युवराज लोणारींनी सत्ताधार्‍यांनी ‘लाडका नगरसेवक योजना’ सुरू केली आहे का? असा प्रश्न केल्यानंतर सत्ताधारी व विरोधकांमध्ये तु तू मैं मै झाली. सत्ताधार्‍यांनी यावेळी 250 विषयांना समर्थन दिल्याचे जाहीर केले.

यांची व्यासपीठावर उपस्थिती
व्यासपीठावर नगराध्यक्षा गायत्री भंगाळे, उपनगराध्यक्षा शैलजा नारखेडे, गटनेता सचिन चौधरी, मुख्याधिकारी विवेक धांडे यांची उपस्थिती होती. कार्यालय अधीक्षक डॉ.अजित भट यांनी विषय पत्रिकेवरील विषयांचे वाचन केले.

40 मिनिटात आटोपली सभा
पालिकेत सत्तांतरण झाल्यानंतर पहिलीच सभा असल्याने मोठ्या प्रमाणावर बंदोबस्तही तैनात करण्यात आला होता. 11.21 वाजता सभेच्या कामकाजाला सुरूवात झाली. विषय क्रमांक 1 ते 5 ला सर्वानुमते मंजुरी मिळाली तर विषय क्रमांक 3, 5, 10, 18 व 27 ला भाजपा नगरसेवकांनी विषय पत्रिकेचे वाचन सुरू असतानाच विरोध करीत विषय नामंजूर असल्याचे सांगितले. प्रभाग क्रमांक दोनमधील सर्वाधिक विषय घेण्यात आल्याने गटनेता लोणारींनी टीका करताच सत्ताधारी व विरोधकांमध्ये तू तै मैं झाली.

गटनेत्यांकडे विषय द्या : आम्ही मंजुरी देवू
स्वीकृत नगरसेवक व माजी आमदार संतोष चौधरी यांनी गदारोळ सुरू असताना सांगितले की, शहराचा सर्वांगीण विकास करायचा आहे त्यामुळे आगामी सभेपूर्वी आपापल्या गट नेत्यांकडे विषय द्यावेत, आम्ही ते मंजूर करू. शहरातील चायना लाईट काढून चांगले पथदिवे बसवावेत, अशा सूचना त्यांनी बंद पथदिव्यांच्या प्रश्नांवर सांगितले.

आयत्या वेळच्या विषयांना विरोध : लोणारी
गटनेता युवराज लोणारी म्हणाले की, चांगल्या विषयांना आम्ही समर्थन दिले आहे. आगामी काळात चांगल्या विषयांना विरोध करणार नाही मात्र चुकीच्या विषयांचा आमचा  विरोध असेल व आम्ही चुकीच्या विषयांबाबत जिल्हाधिकार्‍यांकडे तक्रार करणार आहोत. डॉ.बाबासाहेब आंबेडकर व्यापारी संकुलातील ई ऑक्शन प्रक्रियेला आमचा विरोध आहे. मुळात 2008 मध्ये 57 व्यापार्‍यांना दुकाने मिळण्याची सूचना केली असून त्यांना प्राधान्याने दुकाने मिळावीत ही आमची मागणी आहे.