वराडसीमजवळ साकारतेय ‘प्रभास्वर’ ध्यान साधना केंद्र

भुसावळ (27 फेब्रुवारी 2026) : वराडसीमजवळ वाघूर धरण रस्त्यावरील साडेपाच एकर विस्तीर्ण परिसरात ’प्रभास्वर ध्यान साधना व कृषी संशोधन केंद्र’ आकाराला येत आहे. या केंद्रात रविवारी, सकाळी 11 वाजता एक विशेष सोहळा रंगणार असून, यामध्ये भारतरत्न डॉ. बाबासाहेब आंबेडकर यांच्या पवित्र अस्थींचे दर्शन आणि नूतन ’शाक्यमुनी कुटी’चे लोकार्पण करण्यात येणार आहे.

त्रिरत्न बौद्ध महासंघातर्फे उभारण्यात येत असलेल्या या केंद्राचा मुख्य उद्देश युवा पिढीमध्ये संविधानिक मूल्ये, समता, मानवता आणि बंधुत्वाचा विचार रुजवणे हा आहे. या कार्यक्रमाचे उद्घाटन आणि प्रवचन नागपूर येथील प्रसिद्ध धम्मचारी अमृतदीप यांच्या हस्ते होणार असून, अध्यक्षस्थानी भुसावळचे धम्मचारी सत्यवज्र असतील. धम्मचारी, धम्ममित्र आणि दानशूर व्यक्तींच्या लोकवर्गणीतून या केंद्रासाठी साडेपाच एकर जागा खरेदी करण्यात आली आहे. गेल्या दोन वर्षांपासून येथे टप्प्याटप्प्याने विकासकामे सुरू आहेत. या मंगलमय सोहळ्याला जास्तीत जास्त धम्मबांधवांनी उपस्थित राहावे, असे आवाहन त्रिरत्न बौद्ध महासंघातर्फे करण्यात आले आहे.