नगराध्यक्षांना नगरसेवकपदही भूषवता येणार !
विधेयक मंजूर : दोन्ही पदांसाठी जनतेचा कौल असल्याचे मानले जाणार
Mayors can also hold the post of corporator! मुंबई (8 फेब्रुवारी 2026) : नगर परिषद, नगरपंचायत आणि औद्योगिक वसाहतींच्या नगराध्यक्षपदी निवडून आलेल्या व्यक्तीला आता एकाच वेळी नगरसेवकपदही भूषवता येणार आहे. यासंदर्भातील विधेयक शुक्रवारी महाराष्ट्र विधिमंडळात मंजूर करण्यात आले.
महाराष्ट्र नगर परिषदा, नगरपंचायती व औद्योगिक नगरी (सुधारणा) विधेयक, 2026 शुक्रवारी विधानपरिषदेत मंजूर झाले. यापूर्वी हे विधेयक विधानसभेत मंजूर करण्यात आले होते.
विधेयकातील महत्त्वाचे मुद्दे
दुहेरी पदभार : सध्या नगर परिषदा, नगरपंचायती आणि औद्योगिक नगरींचे नगराध्यक्ष थेट जनतेतून निवडले जातात. या नवीन विधेयकानुसार, जी व्यक्ती नगरसेवक म्हणून निवडून येण्यास पात्र आहे, ती नगराध्यक्षपदासाठीही पात्र ठरेल.
निवडणूक प्रक्रिया मतदानाचा अधिकार मात्र एकच मत देता येणार
एखादी व्यक्ती नगराध्यक्ष आणि नगरसेवक अशा दोन्ही पदांसाठी एकाच वेळी निवडणूक लढवू शकते आणि दोन्ही पदांवर निवडूनही येऊ शकते. अशा व्यक्तीकडे दोन्ही पदांसाठी जनतेचा कौल असल्याचे मानले जाईल.
जर एखादी व्यक्ती दोन्ही पदांवर निवडून आली, तर तिला (सभेत) नगरसेवक किंवा नगराध्यक्ष म्हणून केवळ एकच मत देता येईल मात्र, मतांची समसमान विभागणी झाल्यास, नगराध्यक्ष म्हणून त्यांना त्यांचे निर्णायक मत’ वापरता येईल. सरकारने यापूर्वी 26 डिसेंबर रोजी यासंदर्भात अध्यादेश काढला होता. आता या अध्यादेशाचे कायद्यात रूपांतर करण्यासाठी हे विधेयक आणले गेले आहे. या विधेयकावर टीका करताना राष्ट्रवादी काँग्रेस (शरद पवार गट) पक्षाचे प्रदेशाध्यक्ष शशिकांत शिंदे म्हणाले की, हे विधेयक केवळ सत्ता काबीज करण्यासाठी आणले गेले असून हा लोकशाहीचा गळा घोटण्याचा प्रकार असल्याचे ते म्हणाले.
