आमदार निधीतील अडीच कोटींच्या कामांना नाहरकत द्यावी : भुसावळात बालकल्याण सभापती शोभा इंगळे यांची मागणी

भाजपा नगरसेवकांनीही घेतली भेट
भुसावळ नगरपालिकेच्या सर्वसाधारण सभेत भाजप नगरसेवकांनी विरोध केलेले 177 विषय नामंजूर करावे, त्याची नोंद प्रोसिडिंगमध्ये करावी, अमृत योजनेतून रखडलेल्या जलकुंभाच्या कामाला गती द्यावी, आमदार निधीतून मंजूरी मिळालेल्या अडीच कोटींच्या विकास कामांना पालिकेने ना हरकत प्रमाणपत्र द्यावे आदी मागण्यांसाठी शुक्रवारी भाजप नगरसेवकांनी मुख्याधिकारी राजेंद्र फातले यांची भेट घेतली. काही दिवसांपासून रजेवर असलेले मुख्याधिकारी राजेंद्र फातले पुन्हा पालिकेत हजर झाले आहे. त्यानंतर भाजपचे गटनेते युवराज लोणारी व नगरसेवकांनी त्यांची भेट घेवून विविध विषयांवर चर्चा केली.

नाहरकत प्रमाणपत्र द्यावे
मुख्याधिकारी विवेक धांडे यांच्या प्रभारी काळात पालिकेची सर्वसाधारण सभा झाली होती. या सभेत 250 विषय अजेंड्यावर होते. मात्र, भाजप, शिवसेना, राष्ट्रवादी अजित पवार गटाच्या 33 नगरसेवकांनी 177 विषयांना विरोध दर्शवला होता. दुसरीकडे राष्ट्रवादी शरद पवार गटाच्या नगरसेवकांनी या विषयांना आवाजी मंजुरी दिली होती. बहुमतामुळे हे विषय नामंजूर करावे, तशी नोंद प्रोसिडिंगमध्ये घ्यावी. सत्ताधारी हे विषय मंजूर करत असतील तर मुख्याधिकार्‍यांनी कलम 308 प्रमाणे हे विषय नामंजूर करण्याचा जिल्हाधिकार्‍यांकडे प्रस्ताव द्यावा, अशी मागणी नगरसेवकांनी केली. भुसावळ शहरासाठी आमदार निधीतून अडीच कोटींची कामे होणार आहे. नगरपालिका प्रशासनाकडून ना हरकत प्रमाणपत्र मिळत नसल्याने हे काम रखडले असल्याने विकास कामांमध्ये अडथळा न आणता या ना हरकत प्रमाणपत्र द्यावे, अशी मागणी भाजप नगरसेवकांनी केली. या वेळी उपनगराध्यक्षा शैलजा नारखेडे, निर्मल कोठारी, गिरीश महाजन, किरण कोलते, परीक्षित बर्‍हाटे, आशिष पटेल, सुजीत भोळे आदींसह पदाधिकारी उपस्थित होते.