भुसावळात लेडीज रनच्या सराव शिबिरास उत्साहात सुरुवात

भुसावळ (4 मार्च 2026) : भुसावळ स्पोर्ट्स अँड रनर्स असोसिएशनतर्फे 12 एप्रिल रोजी बिसारा लेडीज इक्वॅलिटी रनचे आयोजन करण्यात आले आहे. स्पर्धकांना धावण्याचा योग्य सराव व्हावा या उद्धेशाने प्रत्येक मंगळवार, गुरुवार व रविवारी सकाळी 6 ते 7 या वेळेत शहरातील कृष्णचंद्र सभागृहाशेजारील मोकळ्या जागेत सराव सत्र घेण्यात येणार आहेत. सर्व सराव सत्र नि:शुल्क आहेत. त्याची सुरुवात मंगळवार, 3 मार्च रोजी ठीक 6 वाजता करण्यात आली. यावेळी स्वतः चांगल्या धावपटू व सायकलपटू असलेल्या जळगावच्या महापौर दीपमाला काळे प्रमुख पाहुण्या म्हणून उपस्थित होत्या.

सुरुवातीस वार्म अप व्यायाम प्रकार घेण्यात आला. त्यांनतर महापौर दीपमाला काळे व स्पर्धेतील लहान धावपटू अवनी मंगेश चंदन या दोघांच्या हस्ते नारळ फोडून कार्यक्रमास विधिवत सुरुवात करण्यात आली. त्यानंतर असोसिएशनच्या नियमित महिला धावपटूंसोबत नवोदित स्पर्धकांनी धावायला सुरुवात केली. यावेळी अग्रस्थानी स्वतः दीपमाला काळे यांच्यासोबत डॉ.नीलिमा नेहेते व डॉ.चारुलता पाटील होत्या. या रनचे शिस्तबद्ध नियमन प्रशांत वंजारी यांनी केले. सर्व धावपटू मैदानापासून डी.आर.एम.कार्यालय-लाल चर्च व तेथून लोको शेड रोड व तेथून पुन्हा मैदानावर परत असे तीन किमी अंतर धावले. त्यानंतर स्ट्रेचिंग व्यायाम प्रकार घेण्यात आला.