जळगावातील पोलिसांच्या पेट्रोल पंपावर अपहार : संशयीताने मुलाच्या खात्यावर वळवले दहा लाख

तपासात संशयीताचे असहकार्य
अपहार केलेल्या 1 कोटी 33 लाख रुपयांबाबत पीएसआय वाघ तपासात सहकार्य करीत नाहीत. त्यांच्या स्वतःच्या बँक खात्यात केवळ 250 रुपये शिल्लक आहेत तसेच अपहारातील रक्केतून त्यांनी कोठे संपत्ती खरेदी केली आहे का? किंवा ती रक्कम कोठे गुंतविली अथवा ती कोणाच्या स्वाधीन केली? या गुन्ह्यात आणखी कोणाचा सहभाग आहे याचा तपास करण्यासाठी संशयित वाल्मिक वाघ आणि त्यांचा मुलगा शेखर वाघ या दोघ पिता-पुत्रांना न्यायालयाने चार दिवसांची पोलिस कोठडी सुनावली.

मुलाच्या खात्यात रक्कम वळवली
पत्नीच्या शस्त्रक्रियेसाठी वडीलांनी मुलाच्या खात्यात पैसे ट्रान्सफर केले, आणि ते मुलाने काढले त्यामुळे मुलाला या गुन्ह्यात गोवणे योग्य नाही. शेखर वाघ याचा या गुन्ह्याशी काहीही संबंध नाही सुरुवातीपासून तो पोलिसांच्या संपर्कात आहे. एका खाजसगी ऑडीटरच्या रिपोर्टवरुन हा गुन्हा दाखल झाला असून या अपहाराबाबत संशयित वाघ यांच्याकडून खुलासा मागविणे गरजेचे होते मात्र तो न मागविता गुन्हा दाखल केल्याचे संशयिताचे वकील अ‍ॅड.अकील ईस्माईल यांनी न्यायालयासमोर सांगितले.

पसार होण्यापूर्वी वाल्मिक वाघ हे बेपत्ता होण्यापूर्वी ते 8 फेब्रुवारी रोजी कुटुंबियांना भेटले. त्यानंतर दुसर्‍या दिवशी त्यांनी दहा ग्रॅम सोने खरेदी करुन मुलाकडे दिले. 10 रोजी बेपत्ता झाल्यानंतर घरी सुसाईट नोट पाठवून त्यांनी वरिष्ठांकडून त्रास दिला जात असल्याचे देखील नोटमध्ये लिहिले त्यामुळे वडीलांनी केलेल्या अपहाराबद्दल त्यांच्या मुलाला माहिती होती, मात्र ती माहिती त्याने पोलिसांपासून लपविल्याचे तपासधिकारी पोलिस निरीक्षक राहुल गायकवाड यांनी न्यायालयासमोर सांगितले.

शरण आलेल्या उपनिरीक्षक वाघ यांच्याकडे अपहाराच्या रकमेबाबत चौकशी केली असता, त्यांनी कोट्यवधींचा नव्हे तर केवळ दहा ते पंधरा लाख रुपये घेतल्याचे पोलिसांना सांगितले. त्यानुसार पोलिसांनी वाघ यांच्यासह त्यांच्या कुटुंबियांच्या बँक खात्याची तपासणी केली असता, त्यांच्या खात्यात काही किरकोळ रक्कम शिल्लक होती तर अपहार झालेल्या काळात वाघ यांच्या खात्यातून त्यांच्या मुलाच्या खात्यामध्ये तब्बल दहा लाख रुपये ट्रान्सपर करण्यात आल्याचे व मुलाने ते बँकेतून काढल्याचे पोलिसांच्या तपासात उघड झाले आहे.