धुळे गुन्हे शाखेची मोठी कामगिरी : एक कोटी 42 लाखांचा 570 किलो गांजा जप्त
एका आरोपीला अटक : रॅकेट उघडकीस येण्याची शक्यता
गोपनीय माहितीवरून कारवाई
स्थानिक गुन्हे शाखेचे पोलीस निरीक्षक श्रीराम पवार यांना संशयीत विश्वजित ज्ञानेश्वर चौगुले याने धुळे शहरातील पश्चिम हुडकोमधील पवन नगरातील राहत्या घरात मानवी मेंदुवर विपरीत परिणाम करणारा गांजा सदृश्य अंमली पदार्थ पाकीटे व गोण्यांमध्ये बेकायदेशीररित्या विक्री करण्याचे उद्देशाने साठवून ठेवल्याची माहिती मिळाल्यानंतर तीन पथकांद्वारे 22 रोजी छापेमारी करण्यात आली. आरोपी विश्वजीत ज्ञानेश्वर चौगुलेच्या घरातून वेगवेगळ्या पाकीटांमध्ये एक कोटी दहा लाख 19 हजार रुपये किंमतीचा 440.76 किलो वजनाचा गांजा जप्त करण्यात आला.
आरोपीच्या आजीच्या घरातून साठा जप्त
आरोपी विश्वजीत ज्ञानेश्वर चौगुले यास विश्वासात घेवून सखोल विचारपूस केल्यानंतर त्याने मोहाडी गावात दंडेवाला बाबा नगरातील त्याच्या आजीच्या घरातदेखील गांजा साठवून ठेवल्याची कबुली दिल्यानंतर पथकाने तेथे छापेमारी करीत 32 लाख 46 हजार 250 रुपये किंमतीचा 129.85 किलो गांजा जप्त करण्यात आला. दरम्यान आरोपी विश्वजित ज्ञानेश्वर चौगुले (24, पश्चिम हुडको, पवन नगर, चाळीसगावरोड, धुळे) याच्याविरोधात यापूर्वी चाळीसगाव रोड पोलिस ठाण्यात तीन गुन्हे दाखल आहेत.
यांनी केली कारवाई
ही कारवाई धुळे पोलीस अधीक्षक श्रीकांत धीवरे, अपर पोलीस अधीक्षक अजय देवरे, धुळे गुन्हे शाखेचे शाखेचे पोलीस निरीक्षक, श्रीराम पवार यांच्या मार्गदर्शनाखाली स्थानिक गुन्हे शाखेचे एपीआय श्रीकृष्ण पारधी, पोलीस उपनिरीक्षक अमरजीत मोरे, उपनिरीक्षक अमित माळी, उपनिरीक्षक चेतन मुंढे, पोलीस अंमलदार सतीष जाधव, संदीप ज.पाटील, प्रकाश सोनार, मच्छिद्र पाटील, हेमंत बोरसे, योगेश चव्हाण, प्रल्हाद वाघ, सचिन गोमसाळे, राहुल सानप, मुकेश वाघ, शशिकांत देवरे, आरीफ पठाण, सुरेश भालेराव, देवेंद्र ठाकुर, पवन गवळी, आशिष वानखेडे, धर्मेद्र मोहिते, सुशील शेंडे, नितीन दिवसे, राजीव गीते व कैलास महाजन आदींच्या पथकाने केली.
