भुसावळात पेट्रोल-डिझेल मुबलक ; अफवांवर विश्वास न ठेवण्याचे डीवायएसपी केदार बारबोलेंचे आवाहन
Ample Supply of Petrol and Diesel in Bhusawal; DySP Kedar Barbole Appeals Not to Trust Rumors भुसावळ (26 मार्च 2026) : शहरात पेट्रोल व डिझेलचा पुरेसा साठा उपलब्ध असून नागरिकांनी कोणत्याही अफवांना बळी पडू नये तसेच घाईगडबडीत इंधन खरेदीसाठी गर्दी करू नये, असे आवाहन भुसावळ उपविभागीय अधिकारी केदार बारबोले यांनी केले आहे. पत्रकार परिषदेत बोलताना त्यांनी स्पष्ट शब्दांत सांगितले की, भुसावळ शहरात इंधनाची कोणतीही टंचाई नसून पुरवठा सुरळीत सुरू आहे.
इंधन टंचाईच्या अफवा
गेल्या काही दिवसांत सोशल मीडियावर इंधन टंचाईच्या अफवा मोठ्या प्रमाणावर पसरत असल्याने शहरातील अनेक पेट्रोल पंपांवर नागरिकांनी मोठ्या प्रमाणात गर्दी केल्याचे चित्र पाहायला मिळाले. काही ठिकाणी लांबच लांब रांगा लागल्या असून काही नागरिकांनी बाटल्या, कॅनमध्ये पेट्रोल साठवण्याचा प्रयत्न केल्याचेही निदर्शनास आले आहे. प्रशासनाने या प्रकाराला अनावश्यक घाई आणि चुकीची प्रतिक्रिया असे संबोधले आहे.
इंधनाची कमतरता नाही
डीवायएसपी बारबोले यांनी स्पष्ट केले की, इंधन पुरवठा यंत्रणा पूर्णपणे कार्यरत असून कोणत्याही प्रकारची कमतरता नाही. त्यामुळे नागरिकांनी संयम राखून केवळ आवश्यक तेवढेच इंधन खरेदी करावे. अनावश्यक साठेबाजीमुळे इतर नागरिकांना अडचणी निर्माण होऊ शकतात, याचीही त्यांनी जाणीव करून दिली. दरम्यान, सोशल मीडियाच्या माध्यमातून चुकीची माहिती पसरवणार्यांवर पोलिस प्रशासनाचे विशेष लक्ष असून अशा अफवा पसरवणार्यांवर कठोर कारवाई करण्यात येईल, असा इशाराही त्यांनी दिला. नागरिकांनी अधिकृत स्रोतांवरच विश्वास ठेवावा, असेही त्यांनी आवर्जून सांगितले.
पंप चालकांनाही सूचना
पेट्रोल पंप चालकांना नियमांचे काटेकोर पालन करण्याच्या सूचना देण्यात आल्या आहेत. पंपांवर अनावश्यक गर्दी होऊ नये यासाठी योग्य व्यवस्थापन ठेवण्याचे निर्देश देण्यात आले आहेत. प्रशासनाच्या या आवाहनाला प्रतिसाद देत नागरिकांनी शांतता राखून परिस्थितीला सहकार्य करावे, असे आवाहन करण्यात आले आहे.
