अखिल भारतीय संत समितीचे राष्ट्रीय महामंत्री महामंडलेश्वर राधे-राधे बाबा
फैजपूर : अयोध्येतील श्री राम मंदिर निर्माणचे कार्य व्यवस्थित व नियोजनानुसार सुरू असून जमिनीचा व्यवहार हा संपूर्ण पारदर्शक आहे. दहा वर्षांपूर्वी झालेला हा व्यवहार असून आज मंदिर निर्माणनंतर त्या ठिकाणी निर्माण होणार्‍या सोयी-सुविधांसाठी जी जमीन खरेदी व व्यवहार होत आहेत ते कायदेशीर असून जमीन ट्रस्टच्या नावावर खरेदी करण्यात आली आहे मात्र त्यावर प्रश्नचिन्ह उपस्थित करून जनतेला भ्रमित करण्याचे कार्य काही मंडळी करीत असल्याचे अखिल भारतीय संत समितीचे राष्ट्रीय महामंत्री महामंडलेश्वर राधे-राधे बाबा (इंदौर) येथे म्हणाले. सतपंथ संस्थानच्या आश्रमात बुधवारी आयोजित पत्रकार परीषदेत ते बोलत होते.
गो वंश हत्यासंदर्भात कायदे कडक करावेत
राधे राधे बाबा म्हणाले की, अयोध्येतील जमीन व्यवहार हा संपूर्ण पारदर्शक असून व्यवहारात कुठलाही भ्रष्टाचार, घोटाळा नसून हे आरोप म्हणजे राजकीय षडयंत्र आहे. महाराष्ट्र सरकारने मध्यप्रदेश व राजस्थानच्या धर्तीवर गोवंश हत्या संदर्भात कडक कायदे करावेत, अशी मागणीही त्यांनी केली. केली
गो मातेला राष्ट्रीय प्राणी म्हणून घोषित करा
या पत्रकार परिषदेत श्री राधे राधे बाबा यांनी गोमातेला राष्ट्रीय प्राणी म्हणून घोषित करण्यात यावी तसेच ’गो’ अभयारण्य निर्माण करण्यासाठी केंद्र सरकारकडे मागणी करण्यात येणार असल्याचे सांगितले. महाराष्ट्र सरकारने त्यासाठी पुढाकार घ्यावा, असे सांगून ते म्हणाले की, आज शिवसेनाप्रमुख बाळासाहेब ठाकरे यांचे नाव मोठ्या निष्ठेने घेतले जाते. त्यांचे पुत्र आज या राज्याचे मुख्यमंत्री आहेत त्यांनी गोवंश हत्या, कत्तलखाने बंद करण्यासाठी कडक पावले उचलावी, अशी मागणीही त्यांनी यावेळी केली.
देणगी न देणारे हिशोब मागत असल्याचे दुर्दैव
महामंडलेश्वर जनार्दन हरी महाराज यांनी पत्रकार परीषदेमागील भूमिका विषद केली. त्यांनी प्रास्ताविकात श्री राम मंदिर निर्माण यासाठी अनेकांनी श्रद्धेने दान दिले आहे मात्र आज देणगी न देणारे हिशोब मागत आहे ही शोकांतिका असल्याचे सांगितले.
यांची होती उपस्थिती
या पत्रकार परीषदेला महामंडलेश्वर पुरुषोत्तमदास महाराज, सावदा येथील सुरेश शास्त्री मानेकर बाबा, स्वामीनारायण गुरुकुलचे उपाध्यक्ष शास्त्री भक्ती किशोर दास, जामनेरच्या गुरुदेव सेवा आश्रमचे श्याम चैतन्य महाराज, स्वामी प्रभुदास महाराज यांची उपस्थिती होती.
