चाळीसगावात जय भवानी, जय शिवाजीच्या गजरात छत्रपती शिवरायांच्या अश्वारूढ पुतळ्याचे अनावरण

जलयुक्त शिवाराचे खरे प्रणेते छत्रपती शिवरायच : देवेंद्र फडणवीस
महाराष्ट्राचे दैवत छत्रपती शिवाजी महाराज हे एकमेव असून ते केवळ योध्दे तर होतेच त्याबरोबरच त्यांनी आदर्श राज्य कसे चालवावे हे देखील शिकविले शिवाय जलयुक्त शिवाराचे ते खरे प्रणेते असल्याचे प्रतिपादन माजी मुख्यमंत्री तथा विरोधी पक्ष नेते देवेंद्र फडणवीस यांनी येथे केले. चाळीसगाव शहरात बुधवारी दुपारी छत्रपती शिवाजी महाराज चौकात छत्रपती शिवाजी महाराजांच्या अश्वारूढ पुतळ्याच्या अनावरण करण्यात आले. याप्रसंगी उद्घाटक तथा प्रमुख अतिथी म्हणून ते बोलत होते.

• छत्रपती शिवाजी महाराज जलयुक्त शिवाराचे खरे प्रणेते : माजी मुख्यमंत्री देवेंद्र फडणवीस

रयतेला स्वाभिमानाने जीवन जगण्याचा मार्ग दाखवला
फडणवीस म्हणाले की, छत्रपती शिवरायांनी स्वराज्याची स्थापना करून सर्वसामान्य रयतेला स्वाभिमानाने जीवन जगण्याचा मार्ग दाखविला व राज्य कारभार करण्याचा आदर्श समोर ठेवला. महाराजांनी विविध किल्ल्याच्या माध्यमातून स्वराज्याला भक्कम संरक्षण मिळवून दिले तसेच जलसंवर्धनच्या माध्यमातून शेतकर्‍यांचे जीवनमान उंचावण्यासाठी कार्य केले. आमचं पाणी,आमचं जंगल… आमचं वृक्ष…ही आमची संपत्ती आहे त्याशिवाय कोणतेही राज्य संपन्न होऊ शकत नाही त्यामुळे ते जलयुक्त शिवाराचे खरे प्रणेते होते. जलसंधारणाच्या माध्यमातून पाण्याचे विकेंद्रीकरण करण्याचे काम महाराजांनी केले असल्याचे ही फडणवीस म्हणाले.