नवापूर : शहरातील (Nawapur City) महामानव डॉ.बाबासाहेब आंबेडकर पुतळ्याजवळील विजय इलेक्ट्रॉनिक्स (Vijay Electronics) दुकानाला गुरुवार, 13 राोजी पहाटे पाच वाजेच्या सुमारास अचानक लागलेल्या आगीने रौद्र रूप धारण केल्याने दुकानातील इलेक्ट्रॉनिक्स वस्तू जळाल्याने सुमारे 70 लाखांचे नुकसान झाले. पहाटेच्या सुमारास आजूबाजूच्या नागरिकांनी मिळेल त्या साधनाने आग विझविण्याचा प्रयत्न केला परंतु आगीचे लोण अधिक पसरल्याने संपूर्ण दुकानातील इलेक्ट्रॉनिक्स सर्वच वस्तू जळून खाक झाल्या. या आगीमध्ये 70 ते 80 लाखांचे इलेक्ट्रॉनिक साहित्य (Electronics Item) जळून खाक झाल्याची माहिती मालक विजय सोनवणे यांनी दिली. दुकान (Shop) आणि गोडाऊन एकाच ठिकाणी असल्याने मोठे नुकसान झाले आहे.
या वस्तू आगीत खाक
आगीत सुमारे 30 ते 40 फ्रिज, 10 एसी (AC), 30 एलईडी टी.व्ही. (LED TV) , 250 फॅन,10 वॉशिंग मशीन, 40 साधे टी.व्ही, होम थिएटर, 50 आर्यन, इतर इलेक्ट्रॉनिक साहित्य जळून खाक झाले आहे. तब्बल चार तासानंतर आगीवर नियंत्रण मिळाले मात्र आग आटोक्यात येत नसल्याने आग विझवण्यासाठी नवापूर नगरपालिकेचे चार बंब लागले आहेत. आगीवर नियंत्रण मिळविण्यासाठी शेजारील गुजरात राज्यातील सोनगड नगरपरीषद अग्निशामक दल व नंदुरबार नगरपरीषद अग्निशमन दलाला पाचारण करण्यात आले. चार तासाने आगीवर नियंत्रण मिळवता आले.
तत्काळ वीजपुरवठा केला बंद
प्रभागातील नगरसेवक खलील खाटीक व निलेश जयस्वाल यांनी थेट छतावर चढून आग विझवण्यासाठी प्रयत्न केले तर शेजारील तौसीफ खाटीक, राहूल नगराळे यांनी घरातील मिळेल त्या साधनाने पाणी (Water) आणून आग विझवण्यासाठी प्रयत्न केले. या दरम्यान शहरातील वीजपुरवठा तात्काळ बंद करण्यात आला होता. दरम्यान, आग विझविताना पालिकेचे (Nawapur Palika) भास्कर भालेराव हे कर्मचारी किरकोळ जखमी झाले.
अधिकार्‍यांची घटनास्थळी धाव
तहसीलदार मंदार कुलकर्णी (Tahasildar Mandar Kulkarni), घटनास्थळी नगराध्यक्षा हेमलता पाटील, मुख्याधिकारी विनायक कोते, सहाय्यक पोलिस निरीक्षक निलेश वाघ, उपनिरीक्षक मनोज पाटील आदींनी घटनास्थळी भेट दिली.
