मुंबई : मॅट्रीमोनियल साईट्च्या ( Matrimonial Site) माध्यमातून अनेक तरुणींची फसवणूक करीत त्यांना लाखोंचा गंडा घालणाऱ्या आरोपीला पोलिसांनी बेड्या ठोकल्या आहेत. विशाल चव्हाण असे या आरोपीचे नाव आहे. विशेष म्हणजे हा आरोपी उच्चशिक्षित आहे.
40 तरुणींना घातला लाखोंचा गंडा
बी.टेक , एमबीएपर्यंतचे शिक्षण घेतले असून. त्याने आतापर्यंत जवळपास 35 ते 40 तरुणींची फसवणूक केली असून या माध्यमातून त्याने त्यांच्याकडून 25 ते 30 लाख रुपये उकळल्याचे समोर आले आहे. त्याच्याविरोधात अनेक तक्रारी दाखल करण्यात आल्या होत्या. शेवटी पोलिसांनी (Mumbai Police) तांत्रिक बाबिंच्या आधारे आरोपीचा माग काढत त्याला अटक केली आहे. गुन्हे शाखेच्या युनिट सातच्या वतीने ही कारवाई करण्यात आली. आरोपी स्व:ताची ओळख लपवण्यासाठी कल्याणमधील एका फ्लॅटमध्ये बाहेरून कुलूप लावून आतमध्ये वास्तव्य करत होता. अखेर पोलिसांनी शोध घेऊन, आरोपी विशाल चव्हाण याला बेड्या ठोकल्या आहेत.
‘असा’ करायचा फसवणूक
आरोपी हा एका मॅट्रीमोनियल साईटवरून, लग्नासाठी म्हणून मुलींशी ओळख करायचा. त्यानंतर तो त्यांच्याशी जवळीक निर्माण करायचा. एकदा जवळीक निर्माण झाली की, तो लग्नाचे आमिष दाखवून त्यांच्याकडे पैशांची मागणी करत असे. अशाचप्रकारे त्याने आतापर्यंत तब्बल 35 ते 40 तरुणींची फसवणूक केली असून, या माध्यमातून त्याने त्यांच्याकडून 25 ते 30 लाख रुपये उकळल्याचे समोर आले आहे.
