नंदुरबार : निझर-नंदुरबार रस्त्यावर धमडाई फाटयाजवळ नाशिक विशेष पोलीस महानिरीक्षकांच्या पथकाने ४५ लाख २० हजार रुपये किंमतीचा विमल गुटखा जप्त केला असून चौघा संशयितांना अटक करण्यात आली. विशेष पोलीस महानिरीक्षक डॉ.बी.जी. शेखर पाटील यांना गुरुवार, २७ जानेवारी रोजी सकाळी गुजरात राज्यातील निझर येथून नंदुरबारमार्गे दोन पिकअप वाहनांमध्ये विमल गुटख्याची वाहतूक होणार आहे अशी खात्रीशिर बातमी मिळतात त्यांनी कारवाईच्या पथकाला सूचना दिल्या.
सापळा रचून कारवाई
विशेष पोलीस पथकाचे प्रमुख पोलिस निरीक्षक बापू रोहम यांनी स्थानिक गुन्हे शाखेचे पोलीस निरीक्षक रविंद्र कळमकर यांच्या मदतीने नंदुरबार येथे निझर-नंदुरबार मार्गावर धमडाई फाट्याजवळील सृष्टी हॉटेलसमोर सापळा रचला. गाडी (क्र. एम.एच- ३९, सी.९२८९) वरील वाहन चालक हा वाहन तेथेच सोडून पळुन गेला तसेच वाहन (क्र.एम.एच-४८ A ए.वाय-६३२०) हिच्यावरील वाहन चालकास पोलिसांनी शिताफीने पाठलाग करुन ताब्यात घेतले. छोटू रमेश भिर्ले (रा. हेकडवाडी, ता.जि.धुळे) यास गाडीमधील मालाबाबत विचारणा केली असता त्याने समाधानकारक उत्तर दिले नाही. वाहनांची तपासणी केली असता त्यात खाकी रंगाचे व पांढर्या रंगाचे प्लास्टीकचे पोते दिसले. ती उघडुन पाहिले असता त्यात महाराष्ट्रात बंदी असलेला विमल गुटखा मिळुन आला. आरोपीने हा माल गुजरातमधील निझर येथून धर्मेश घनश्यामदास हासानी (रा.नंदुरबार) याच्याकडुन विकत घेवून धुळे येथील विक्की महादेव परदेशी (रा.धुळे), एकनाथ (बाळू) भालचंद्र पाटील (रा.धुळे) यांनी घेतल्याची माहिती दिली.
