पानबारा आश्रमशाळेतील 22 लॅपटॉप लांबवणारी टोळी पोलिसांच्या जाळ्यात
पोलिस अधीक्षक पी.आर.पाटील यांची पत्रकार परीषदेत माहिती
नंदुरबार : नवापूर तालुक्यातील पानबारा आश्रमशाळेतील 22 लॅपटॉप चोरणार्‍या अल्पवयीन मुलांच्या टोळीचा विसरवाडी पोलिसांनी छडा लावला आहे, अशी माहिती पोलिस अधीक्षक पी.आर.पाटील यांनी पत्रकार परिषदेत दिली.
12 रोजी टोळीने चोरले लॅपटॉप
ते म्हणाले की, पानबारा आश्रम शाळेतून दिनांक 12 फेब्रुवारी रोजी लॅपटॉप चोरी झाले होते. त्याची किंमत सुमारे दोन लाख 64 हजार रुपये इतकी आहे. याबाबत प्रकाश वसावे यांनी विसरवाडी पोलिस ठाण्यात फिर्याद दिली होती. याबाबत आपण विसरवाडी पोलि ठाण्याचे सहाय्यक पोलीस निरीक्षक नितीन पाटील यांना या प्रकरणाचा तपास लावण्याच्या सूचना दिल्या. त्यानुसार सहायक पोलिस निरीक्षक नितीन पाटील यांनी पोलि उपनिरीक्षक भूषण बैसाणे यांच्यासह पथक तयार करून हा छडा लावला. सोनखांब आश्रम शाळेच्या दहावीच्या वर्गातील एका विद्यार्थ्याकडे लॅपटॉप असल्याची माहिती मिळाल्यानंतर या पथकाने त्याची चौकशी केली. या विद्यार्थ्याने मित्रांसह शासकीय आश्रम शाळा पानबारा येथून लॅपटॉप चोरी केल्याची कबुली दिली. ही कारवाई पोलिस उपनिरीक्षक भूषण बैसाणे, पोलिस कॉन्स्टेबल निलेश पाडवी, अनिल राठोड, विपुल नाईक, पिंटू पावरा , अतुल पानपाटील, विशाल गावित या पथकाने केली आहे.
