SSC Exam दहावीच्या विद्यार्थ्यांसाठी महत्वाची बातमी : दहावी परीक्षा शिक्षण घेत असलेल्या शाळेतच होणार !
SSC Exam पुणे : दहावीच्या विद्यार्थ्यांसाठी ही महत्वाची बातमी आहे. मंगळवार, 15 मार्चपासून दहावी परीक्षेला सुरुवात होणार असलीतरी यंदाची परीक्षा (SSC Exam) मात्र विद्यार्थी शिक्षण घेत असलेल्या शाळेतच होणार असल्याने विद्यार्थ्यांमध्ये मोठे उत्साहाचे वातावरण आहे. आधीच एस.टी.संपामुळे ग्रामीण भागात वाहतूक ठप्प असल्याने विद्यार्थ्यांना परीक्षा केंद्रावर अडचणी येत आहेत त्यामुळे स्थानिक स्तरावर होणार्‍या परीक्षेमुळे विद्यार्थ्यांना मोठा दिलासा मिळणार आहे.
भयमुक्त वातावरणात जावे परीक्षेला सामोरे
महाराष्ट्र राज्य माध्यमिक व उच्च माध्यमिक शिक्षण मंडळातर्फे घेतल्या जाणार्‍या इयत्ता दहावीच्या परीक्षेस (SSC Exam) येत्या मंगळवारपासून सुरुवात होत असून परीक्षेसाठी सर्व शाळा, शिक्षक व मुख्याध्यापक सज्ज झाले आहेत. विद्यार्थ्यांना त्यांच्याच शाळांमध्ये परीक्षा देण्याची संधी राज्य मंडळाने उपलब्ध करून दिलेली आहे. त्यामुळे विद्यार्थ्यांनी भयमुक्त वातावरणात परीक्षेला सामोरे जावे,असे आवाहन मुख्याध्यापक संघाने केले आहे.
पालकांसह विद्यार्थ्यांना मोठा दिलासा
कोरोनाच्या पार्श्वभूमीवर राज्य मंडळाने इयत्ता दहावीच्या परीक्षा (SSC Exam) विद्यार्थी शिक्षण घेत असलेल्या शाळांमध्येच आयोजित करण्याचे ठरवले. त्यामुळे पालक व विद्यार्थ्यांना मोठा दिलासा मिळाला. कोरोना संसर्ग टाळण्यासाठी सर्व शाळांनी परीक्षेची योग्य तयारी केली आहे. विद्यार्थ्यांना सुद्धा परीक्षा सुरू होण्यापूर्वी थर्मल स्कॅनिंगसाठी शाळेत लवकर उपस्थित रहावे लागणार आहे. दरवर्षी प्रमाणे यंदाही गैरमार्गाविरोधात लढा ही मोहीम राबविली जाणार असून, कॉपी करणार्‍या विद्यार्थ्यांविरुद्ध कारवाई करण्यात येणार आहे.
