थकबाकीदार शेतकर्‍यांचा वीजपुरवठा खंडित करणार नाही : उर्जामंत्र्यांची मोठी घोषणा
मुंबई : थकबाकीदार शेतकर्‍यांचा वीजपुरवठा कापण्याचा सपाटा महावितरण कंपनीने लावल्यानंतर त्याचे पडसाद विधानसभेत उमटले. यानंतर राज्यातील ज्या शेतकर्यांनी वीज बिल भरले नाही, त्यांचा वीजपुरवठा खंडीत करण्याची मोहिम तूर्तास थांबवण्यात येत असल्याची महत्वाची घोषणा मंगळवारी ऊर्जा मंत्री नितीन राऊत यांनी विधानसभेत केल्याने शेतकर्‍यांना मोठा दिलासा मिळाला आहे.
शेतकर्‍यांमधून वाढला नाराजीचा सूर
महावितरणची थकबाकी मोठ्या प्रमाणात बाकी असल्याने अडचणी निर्माण झाल्या आहेत. यामुळे महावितरणने राज्यभरात धडक मोहिम सुरू केली आहे. यात घरगुती, कृषी आणि औद्योगिक ग्राहकांकडून वसुली करण्यात येत आहे. तर थकबाकी न भरणार्यांची वीज जोडणी तोडण्यात येत आहे. या पार्श्वभूमिवर, कृषी थकबाकीची वसुली मोहिम देखील मोठ्या प्रमाणात सुरू होती. यामुळे राज्यातील अनेक भागांमध्ये नाराजीचा सूर होता.
तूर्तास मोहिम थांबणार
उर्जामंत्री नितीन राऊत यांनी मंगळवारी विधानसभेत थकबाकी असणार्‍या शेतकर्‍यांचीी वीज जोडणी तोडण्याची मोहिम तूर्तास थांबविण्यात येत असल्याची घोषणा केली. यामुळे राज्यातील लक्षावधी शेतकर्‍यांना मोठा दिलासा मिळाला आहे. याआधी मार्च महिन्याच्या अखेरीस थकीत वीज बिले भरण्याची मुदत असल्याने अनेक शेतकर्‍यांसमोर मोठे संकट उभे राहिले होते. आता मात्र उर्जामंत्र्यांच्या घोषणेमुळे त्यांना दिलासा मिळाला आहे.
