कुपवाड : प्रेमी युगुलाने गळफास लावून आत्महत्या केल्याची धक्कादायक घटना सोमवारी सकाळी बामणोली (ता. मिरज) येथील दत्तनगर मआयडीसीमधील एका खत कारखान्याच्या गोदामात उघडकीस आली. ात्महत्येचे नेमके कारण समजू शकले नाही. पांडुरंग दादासाहेब दुधाळ (21, रा. चिंतामणीनगर, सांगली) आणि काजल सुरेश सायार (16, रा. दत्तनगर, बामनोली) अशी मृतांची नावे आहेत.
गळफास घेत आत्महत्या
मृत पांडुरंग दुधाळ हा दत्तनगरातील एका खत गोदामात कामास होता, तर काजल ही शिक्षण घेत होती. काजल ही पांडुरंग काम करीत असलेल्या खत गोदामालगतच वसाहतीत राहत होती. त्यामुळे गेल्या काही दिवसांपासून त्यांच्यामध्ये प्रेमसंबंध जुळले. दरम्यान, शनिवारी सायंकाळी नेहमीप्रमाणे खत गोदाम बंद झाले होते. रविवारी या गोदामाला साप्ताहिक सुटी होती. गोदाम बंद असल्याची संधी साधून पांडुरंग याने खत गोदामाचे कुलूप तोडले. त्यानंतर दोघांनीही या गोदामात प्रवेश करून छताच्या अँगलला दोरीने गळफास लावून आत्महत्या केली. सोमवारी नेहमीप्रमाणे गोदामातील अन्य कर्मचारी कामावर आले असता, त्यांना कुलूप तोडलेले दिसले. त्यांनी आत जाऊन पाहिले असता, पांडुरंग व काजल यांचे मृतदेह गळफास घेतलेल्या अवस्थेत दिसून आले.
पोलिसांनी घेतली धाव
घटनेची माहिती कुपवाड एमआयडीसी पोलीस ठाण्यास देण्यात आली. सहायक पोलीस निरीक्षक अविनाश पाटील यांच्या नेतृत्वाखाली पथकाने तत्काळ घटनास्थळी धाव घेऊन पंचनामा केला. या घटनेची कुपवाड एमआयडीसी पोलीस ठाण्यात नोंद झाली आहे. आत्महत्येचे कारण रात्री उशिरापर्यंत समजू शकले नाही. कुपवाड पोलीस अधिक तपास करीत आहेत.
