लग्नापूर्वीच सासरच्यांनी हिणवल्याने कुर्‍हेपानाचेतील उच्च शिक्षीत तरुणीची आत्महत्या
भुसावळ : दोन आठवड्यांपूर्वीच साखरपुडा झालेल्या एका उच्चशिक्षित तरुणीस होणार्‍या पतीसह सासूने गावंढळ आहे असे म्हणून हिणवले. लग्नात थाटमाट करण्यासाठी आग्रह केला. सोने, रोख रक्कम घेऊन येण्याची मागणी केली. हा त्रास असह्य झाल्याने अखेर या तरुणीने गळफास घेऊन आत्महत्या केली. तिला आत्महत्येस प्रवृत्त करणार्‍यांविरुद्ध कठोर कारवाई करावी, अशी मागणी माहेरच्या लोकांनी पोलिसांकडे केली. ही घटना 25 रोजी सायंकाळी उघड झाली. रामेश्वरी रवींद्र नागपुरे (बारी, 24, रा.कुर्‍हे पानाचे, ता. भुसावळ) असे मृत तरुणीचे नाव आहे.
विवाहापूर्वीच वारंवार पैशांची मागणी
रामेश्वरीचे एमएपर्यंत शिक्षण झाले होते. तिचे चुलत भाऊ जीवन बारी यांनी दिलेल्या माहितीनुसार, मूळचा रावेर येथील भूषण ज्ञानेश्वर पाटील (बारी) या तरुणाशी रामेश्वरीचे लग्न ठरले होते. भूषण नाशिकमध्ये राहत असून, वैद्यकीय प्रतिनिधीचे काम करतो. विवाहानिमित्ताने सहा मार्च रोजी कुर्‍हे पानाचे गावात साखरपुडा झाला. त्याच्या आईने रवींद्र नागपुरे यांच्याकडून 25 हजार रुपये रोख घेतले. हुंड्यात तीन तोळ सोन्याचे दागिने व 50 हजार रुपये रोख द्यायची मागणी केली. ही मागणी नागपुरे यांनी मान्य केली होती. यानंतर भूषणने रामेश्वरीला फोन करून वारंवार पैशांची मागणी केली. चार दिवसांपूर्वी त्याने नागपुरे यांना रावेर शहरात बोलावून घेत त्यांच्याकडून हुंड्याची रक्कम व दागिने घेतले.
दागिणे व रोख रकमेनंतरही सुटली नाही हाव
मुलीच्या संसारासाठी नागपुरे यांनी दागिने व रोख रक्कम दिली होती. पैसे मिळाल्यानंतरही भूषणची हाव कमी झाली नाही. त्याने पुन्हा रामेश्वरीला फोन करून लग्न थाटात लावून देण्याची मागणी केली. लग्नात बग्गी पाहिजे, मोठ्या लॉनमध्ये लग्न करावे, स्टेजवर एसी हवा, मंडपात कुलर हवे अशा मागण्या भूषण व त्याची आई करीत होती. ही बाब रामेश्वरीने वडिलांना सांगितली होती. या वेळी त्यांनी भूषणच्या आईस फोनवरून विचारणा केली असता त्यांनीही मुलाने सांगितलेल्या अटी कायम ठेवल्या होत्या. त्यानुसार नागपुरे नियोजनात व्यग्र झाले होते.
लग्न मोडणार असल्याचे नियोजित पतीने बजावले
काही दिवसांनी भूषणने रामेश्वरीला फोन करून ‘तू गावंढळ आहेस, मला पसंत नाही, मी हे लग्न मोडणार आहे’ असे बोलून हिणवले. त्याचे मन राखण्यासाठी रामेश्वरीने जिम लावली होती. जिममध्ये जाऊन वजन कमी करणार असल्याचे तिने भूषणला सांगितले. जिममध्ये व्यायाम करीत असल्याचे काही फोटो तिने व्हॉट्सअ‍ॅपवरून भूषणला पाठवले होते. तरीही ‘आता त्याचा काही उपयोग होणार नाही, मी लग्न मोडणार आहे’ असा रिप्लाय भूषणने दिला होता.
22 तासांनंतर रुग्णालयातून मृतदेह घेतला ताब्यात
रामेश्वरीला छळणार्‍या भूषण व त्याच्या आई विरुद्ध गुन्हा दाखल करावा, तेव्हा मृतदेह ताब्यात घेऊ, असा पवित्रा नातेवाइकांनी घेतला होता. शनिवारी सकाळपासून हे लोक तालुका पोलिस ठाण्यात बसून होते. पोलिसांनी जबाब घेऊन चौकशी करू. दोषींवर गुन्हा दाखल करू, असे आश्वासन दिले. यानंंतर दुपारी 2 वाजता मृतदेह ताब्यात घेतला.
रेल्वे प्रवाशांना इकडे लक्ष द्या ! : 29 जूनपासून रेल्वे गाड्यांमध्ये जनरल डबे लागणार
