चाळीसगाव : वकीलाच्या अंगावर पेट्रोल टाकून त्यांना जिवंत जाळण्याचा प्रयत्न झाल्याची धक्कादायक घटना चाळीसगाव न्यायालयातील वकील संघाच्या दालनासमोरील व्हरांड्यात मंगळवारी सकाळी घडली. पोलिसांनी याप्रकरणी करजगाव येथील किसन मोतीराम सांगळे या वयोवृद्धाला अटक केली आहे. या घटनेनंतर अॅड.सुभाष तोताराम खैरनार यांना खाजगी रुग्णालयात उपचारार्थ हलवण्यात आले आहे.
जळगावात एलआयसी शाखा प्रबंधकांकडे चोरी : दिड लाखांचा ऐवज लंपास
चाळीसगाव पोलिसात वयोवृद्धाविरोधात गुन्हा
अॅड.खैरनार यांच्या तक्रारीनुसार, 2010 ते 2013 दरम्यान करजगाव येथील किसन सांगळे यांनी त्यांच्या शेतजमिनीच्या दिवाणी वादाबाबत, चाळीसगाव न्यायालयात दावा दाखल केला. त्यांच्या वतीने अॅड.खैरनार यांनी खटला चालवला व त्यांच्या बाजूने मनाई हुकूम पारीत करून दिला होता. त्यानंतर सांगळे यांच्या दुसर्या जमिनीबाबत असलेल्या दिवाणी दाव्यात, अॅड.खैरनार यांनी त्यांना दुसरा वकील नेमावा, असे सांगितले होते. दोन्ही दाव्यांचा निकाल सांगळे यांच्या बाजूने लागला होता. त्यानंतर जमिनीबाबतच्या जळगाव दिवाणी न्यायालयातील दाव्याचा निकाल सांगळे यांच्या विरोधात लागला. हे दावे अॅड.खैरनार यांनी लढवले नसताना सांगळे यांनी अॅड.खैरनार व इतर तीन वकिलांविरोधात बार असोसिएशनकडे तक्रार केली होती. त्यावर सध्या सुनावणी सुरू असतानाच अॅड.एस.टी.खैरनार हे मंगळवारी सकाळी 11.30 सुमारास वकील संंघाबाहेरील ओट्यावर सुपूत्र अॅड.उदय खैरनार यांच्याशी चर्चा करीत असताना किसन सांगळे यांनी पिशवीतून पेट्रोलची बाटली काढत अॅड.सतीश खैरनार यांच्या अंगावर पेट्रोल टाकून पेटवण्याचा प्रयत्न केला मात्र त्याचवेळी अॅड.रणजीत पाटील, अॅड.धीरज पवार, अॅड.राहुल पाटील, अॅड. भागवत पाटील हे मदतीला धावून आले. त्यांनी सांगळे यांच्या हाताला झटका देऊन आगपेटी खाली पाडली. त्यानंतर वकिलांनी सांगळे यांना न्यायालयात असलेल्या केस वॉच पोलिसांच्या ताब्यात दिले.
करजगावच्या वयोवृद्धाला अटक
याप्रकरणी अॅड.सुभाष खैरनार यांनी पोलिस ठाण्यात दिलेल्या तक्रारीवरून किसन सांगळे यांच्या विरोधात गुन्हा दाखल करण्यात आला असून सांगळे यांना अटक करण्यात आली. तपास सहाय्यक निरीक्षक सागर ढिकले करत आहेत. दरम्यान, अॅड.एस.टी.खैरनार यांच्यावर शहरातील खाजगी रुग्णालयात उपचार सुरू आहेत.
साकळी शिवारात केळी बागेला आग : 15 लाखांचे नुकसान
