नशिराबाद टोलनाक्याचा मनमानी कारभाराविरोधात भाजपाचे शुक्रवारी टोल नाका बंद आंदोलन
भुसावळ : नशिराबाद टोल नाक्यावर सुरू असलेल्या मनमानी कारभाराच्या विरोधात भुसावळचे आमदार संजय सावकारे यांच्या नेतृत्वाखाली शुक्रवारी टोल नाका बंद आंदोलन छेडण्यात येणार आहे. भुसावळ राष्ट्रीय महामार्गावरील नशिराबाद टोल नाक्यावर केवळ 1 ते 10 तारखेपर्यतच पास काढता येईल व नंतर पास मिळणार नाही, असा अजब फतवा काढण्यात आल्याने गुरूवारपर्यत हा निर्णय मागे न घेतल्यास आंदोलनाचा इशारा आमदारांनी दिला आहे. ज्या तारखेला पास काढला त्या तारखेपासून एक महिना पास चालायला पाहीजे मात्र येथील टोल नाक्यावरील व्यवस्थापनाने त्यांची मनमानी सुरू केली आहे, पास काढणार्‍यांना फक्त 1 ते 10 तारखेपर्यंतच पास काढता येईल, असा फलक लावल्यात आल्याने वाहनधारक प्रचंड संतप्त झाले आहेत.
जिल्हाधिकार्‍यांकडे आमदारांची तक्रार
गुरुवार, 15 जून रोजी टोल प्रशासनाने ज्या वाहनधारकांना पास पाहिजे त्यांना पास उपलब्ध करून दिला नाही तर शुक्रवारी भाजपा टोलनाका बंद पाडणार आहे. महामार्ग व जिल्हाधिकारी यांच्याकडे रीतसर तक्रार करण्यात आली असून आज निर्णय अपेक्षित आहे अन्यथा आंदोलन केले जाणार आहे.
