शिवसेना पुर्नबांधणीसाठी संपर्क प्रमुख विलास पारकर जिल्ह्यात

भुसावळ : शिवसेनेत झालेल्या राजकीय बंडानंतर शिवसेना पक्षप्रमुख तथा मुख्यमंत्री उध्दव ठाकरे यांनी मुंबईत शिवसेनेच्या जिल्हाप्रमुखांची बैठक नुकतीच घेतली. या बैठकीत भुसावळ विभागाचे जिल्हाप्रमुख समाधान महाजन यांच्यासह जिल्ह्यातील जिल्हाप्रमुखांनी हजेरी लावली. बैठकीत दिलेल्या सूचनेप्रमाणे आता पक्षाची पूर्नबांधणी केली जात असून त्यानुषंगाने भुसावळ विभागात कार्यकर्ता मेळावा, बैठकांचे सत्र रविवार, 26 जूनपासून सुरू होत आहे. रावेर लोकसभा शिवसेना संपर्क प्रमुख विलास पारकर त्यासाठी जिल्ह्यात दाखल झाले आहेत.

भुसावळातील ब्राह्मण संघात आज बैठक
भुसावळ विधानसभेतील शहर व तालुक्यातील सर्व शिवसैनिकांना रावेर लोकसभा शिवसेना संपर्क प्रमुख विलास पारकर, विधानसभा संपर्क प्रमुख सुरेश राणे आणि जिल्हाप्रमुख समाधान महाजन रविवारी सायंकाळी पाच वाजता मार्गदर्शन करतील. शहरातील बाजार वार्डातील ब्राह्मण संघात ही बैठक होत आहे. भुसावळ शिवसेनेचे सर्व प्रमुख पदाधिकारी, महिला आघाडी, युवासेना, रेल कामगार सेना, अल्पसंख्याक आघाडी, शिक्षक सेना, दिव्यांग सेना, एस टी कामगार सेना, ग्राहक संरक्षण कक्ष पदाधिकारी, आजी-माजी लोकप्रतिनिधी तसेच शिवसेनेच्या सर्व अंगीकृत संघटनांचे पदाधिकारी कार्यकर्ते व शिवसैनिकांना उपस्थिती बंधनकारक करण्यात आली आहे.