चिंचखेड्यात त्रासाला कंटाळून पतीची हत्या : पत्नीसह चौघांना अटक
चिंचखेडा गावात खळबळ : संशयीतांना बुधवारपर्यंत पोलिस कोठडी
In Chinchkheda the husband was killed due to suffering : Four arrested including the wife साक्री : पतीच्या त्रासाला कंटाळून पत्नीने आई-वडिलांच्या मदतीने पतीची गळा आवळून व मारहाण करून हत्या केल्याची धक्कादायक घटना साक्री तालुक्यातील चिंचखेडा येथे सोमवारी सकाळी घडली. या प्रकरणी पिंपळनेर पोलिसात चौघांविरोधात गुन्हा दाखल करण्यात आला असून अटकेनंतर आरोपींना न्यायालयाने बुधवारपर्यंत पोलिस कोठडी सुनावली. अजय भाल्या उर्फ भालचंद्र बर्डे (39, रा.काकसेवड पैकी चिंचपाडा, ता.साक्री) असे खून झालेल्या पतीचे नाव आहे.
चौघा आरोपींना अटक
अजय हा पत्नी सुंदराबाई बर्डे हिच्याशी नेहमीच काहीना काही कारणावरून वाद घालून मारहाण करीत असल्याने या प्रकारास त्या कंटाळल्या होत्या. सोमवार, 20 सकाळी सात वाजता पुन्हा पतीने वाद उकरून काढल्यानंतर शांताराम हट्या मालचे, डॅनियल शांताराम मालचे व शानुबाई शांताराम माळचे (रा.मांजरी, ता.साक्री) या दोघांनी अजयला धरून हाताबुक्यांनी पोटावर व पाठीवर मारहाण केली तसेच गळा आवळल्याने त्याचा मृत्यू झाला. या प्रकरणी मयताचे आजोबा लक्ष्मण कुची बर्डे यांनी दिलेल्या फिर्यादीवरून चौघांविरोधात पिंपळनेर पोलिसात खुनाचा गुन्हा दाखल झाल्यानंतर अटक करण्यात आली. तपास उपनिरीक्षक प्रदीप सोनवणे करीत आहेत.





