ऑक्टोंबर महिन्यात होणार स्थानिक स्वराज्य संस्थांच्या निवडणुका
निवडणूक आयोगाकडून तयारी सुरू : इच्छुकांचे देव पाण्यात : आता उत्सुकता निवडणूक कार्यक्रमाची
Elections to local bodies will be held in the month of October मुंबई : राज्यातील महापालिका व नगरपालिका निवडणुका लांबवल्यानंतर या निवडणुकांकडे इच्छुकांचे लक्ष लागून होते तर निवडणुका लांबत चालल्याने प्रशासक राजवटीत विकासकामे करताना अनेक अडचणी येत होत्या मात्र आता राज्य निवडणूक आयोगाने राजपत्र जारी केले असून आगामी सप्टेंबर वा ऑक्टोंबर महिन्यात स्थानिक स्वराज्य संस्थांच्या निवडणुका होण्याचे संकेत आहेत. त्यासाठीची तयारी निवडणूक आयोगाकडून सुरू झाली आहे.
अडीच वर्षांपासून प्रशासक राज
कोविड संकट, त्यानंतर राज्यात सुरू झालेला सत्तासंघर्ष, शिवसेनेपाठोपाठ राष्ट्रवादीत पडलेली उभी फूट यामुळे राजकीय घडामोडी वेगाने घडल्यानंतर आता राज्यातील महापालिका व नगरपालिका व नगरपंचायतीच्या निवडणुका लवकरच होण्याची शक्यता आहे.
ओबीसी आरक्षणाशिवाय होणार निवडणुका ?
1 जुलै 2023 दिवशी अस्तित्त्वात असलेल्या विधानसभेच्या मतदार याद्या सप्टेंबर 2023 या कालावधीत होणार्‍या स्थानिक स्वराज्य संस्थांच्या निवडणुकीसाठी वापरण्यात येणार असल्याचं निवडणूक आयोगानं म्हटलं आहे. त्यामुळे निवडणूक आयोगानं रखडलेल्या निवडणुका घेण्याच्या हालचाली सुरू केल्या आहेत शिवाय ओबीसी आरक्षणाशिवाय या निवडणुका होण्याची शक्यता वर्तवली जात आहे.
निवडणूक कार्यक्रमाची घोषणा नाही : निवडणूक आयुक्त
निवडणूक आयोगातर्फे 5 जुलै 2023 रोजी स्थानिक स्वराज्य संस्थांच्या निवडणुकांसंदर्भातील मतदार यादीबाबतची (कट ऑफ डेट) अधिसूचना प्रसिद्ध झाली असून त्यात प्रत्यक्षात कोणत्याही निवडणूक कार्यक्रमाची घोषणा करण्यात आली नाही. शिवाय ग्रामपंचायत निवडणूक वगळता अन्य सर्व स्थानिक स्वराज्य संस्थांच्या निवडणुकांबाबत सर्वोच्च न्यायालयाने ‘जैसे थे चे’ आदेश दिले आहेत त्यामुळे निवडणूक कार्यक्रमाची घोषणा करण्याचा प्रश्न उद्भवत नाही, असे स्पष्टीकरण राज्य निवडणूक आयुक्त यू. पी. एस. मदान यांनी दिले आहे.
