Bhusawal market police inspector along with three in ACB’s net भुसावळ : बायोडिझेलच्या प्रकरणात सहआरोपी न करण्यासाठी पाच लाखांची लाच मागून तडजोडीअंती तीन लाख रुपयांची लाच घेताना भुसावळ बाजारपेठ पोलीस ठाण्याचे निरीक्षक राहुल गायकवाड (Bhusawal Market Police Station Inspector Rahul Gaikwad) यांच्यासह खाजगी ईसम ऋषी दुर्गादास शुक्ला (Rishi Durgadas Shukla) व बाजारपेठ पोलीस ठाण्याचे नाईक तुषार पाटील (Naik Tushar Patil) यांना धुळे एसीबीच्या पथकाने लाच स्वीकारताच अटक केली. धुळे एसीबीच्या या कारवाईने पोलीस वर्तुळात प्रचंड खळबळ उडाली आहे.
असे आहे लाच प्रकरण
तक्रारदार व त्यांचा मित्र 14 जुलै रोजी भुसावळात आल्यानंतर ऋषी शुक्ला यांची भेट झाली. तक्रारदार यांच्यावर मित्रावर गुन्हा दाखल असून त्यांना सहआरोपी करण्यात येणार असल्याने आरोपी व्हायचे नसेल तर निरीक्षक राहुल गायकवाड व सहाय्यक निरीक्षक सांगळे यांना पाच लाख रुपये द्यावे लागतील, असे शुक्ला यांनी सांगत साहेबांपुढे येवू नको अन्यथा तुला ते आरोपी करतील, अशी धमकी दिली. तुझ्या मित्राला साहेबांसोबत भेट घेण्यासाठी पाठव, असे सांगितल्यानंतर मंगळवार, 18 रोजी भेट घेण्याचे ठरले. तक्रारदाराने दिलेल्या माहितीनंतर लाच पडताळणी करण्यात येवून तक्रार नोंदवण्यात आली व पोलीस निरीक्षक गायकवाड, अधिकारी सांगळे यांच्याकरीता पोलीस नाईक तुषार पाटील यांच्या सांगण्यावरून व प्रोत्साहित केल्यावरून सापळा रचण्यात आला.
बोदवड तालुक्यानजीक ऋषी शुक्ला यास पकडले
बोदवड येथे पोलीस निरीक्षकांची मंगळवारी साक्ष असल्याने ते तेथे गेल्यानंतर ऋषी शुक्ला यांनी निरीक्षक व अधिकार्यांसाठी तीन लाखांची लाच मनुर फाट्यावर स्वीकारल्यानंतर त्यास अटक करण्यात आली तर नंतर पोलीस निरीक्षक राहुल गायकवाड यांचा सहभाग स्पष्ट होताच त्यांनादेखील अटक करण्यात आली तर संशयित तुषार पाटील हा पसार झाला होता मात्र नंतर त्यासदेखील अटक करण्यात आली.
यांनी केला सापळा यशस्वी
हा सापळा नाशिक एसीबीच्या पोलीस अधीक्षक शर्मिष्ठा घारगे-वालावलकर, अपर पोलीस अधीक्षक माधव रेड्डी, पोलीस उपअधीक्षक नरेंद्र पवार यांच्या मार्गदर्शनाखाली धुळे एसीबीचे पोलीस उपअधीक्षक अभिषेक पाटील, हवालदार राजन कदम, संतोष पावरा, रामदास बारेला, हवालदार चालक सुधीर मोरे आदींच्या पथकाने यशस्वी केला.
