भुसावळात ‘वन नेशन वन कार्ड’ वितरणाचा शुभारंभ

Distribution of ‘One Nation One Card’ started in Bhusawal भुसावळ : ‘एक देश एक शिधापत्रिका’या संकल्पनेत भुसावळ शहरासह तालुक्यातील सर्वच रेशनकार्डधारकांना आता भाविष्यात ई- रेशनकार्ड मिळणार असून त्याचे प्रातिनिधीक स्वरूपात वितरण सुरू करण्यात आल्याचे जळगाव अपर जिल्हाधिकारी प्रवीण महाजन यांनी येथे सांगितले. भुसावळ प्रांताधिकारी कार्यालयात गुरुवारी दुपारी ‘वन नेशन वन कार्ड’ वितरणाचा शुभारंभ त्यांच्याहस्ते झाला. प्रसंगी महाजन बोलत होते. प्रसंगी त्यांच्याहस्ते प्रातिनिधीक स्वरुपात विधवा, अपंग व आदिवासी 30 लाभार्थींना ई रेशनकार्ड देण्यात आले. महाजन म्हणाले की, भुसावळ तालुक्यातील 47 हजार कार्डाचे रूपांतर ई-रेशनकार्डात होणार असून वंचितांना सुविधा मिळणार असून देशभरात आता लाभार्थींना कुठेही धान्याचा लाभ या कार्डाच्या माध्यमातून घेता येईल. यावेळी प्राधान्य कुटूंब योजनेसह अंत्योदय योजनेतील लाभार्थींना प्रमाणपत्र देण्यात आले तर राष्ट्रीय अर्थसहाय्य योजना पुरस्कृत 11 विधवा महिलांना प्रत्येकी 20 हजार रुपये लाभाचे प्रमाणपत्र तसेच विविध दाखल्यांचे वाटप प्रसंगी करण्यात आले.

यांची कार्यक्रमास उपस्थिती
प्रांताधिकारी कार्यालयात झालेल्या कार्यक्रमास प्रांताधिकारी जितेंद्र पाटील, भुसावळ तहसीलदार निता लबडे, निवासी नायब तहसीलदार शोभा घुले, निवडणूक नायब तहसीलदार अंगद आसटकर, भगवान शिरसाठ आदींची प्रमुख उपस्थिती होती. याप्रसंगी अपर जिल्हाधिकारी म्हणाले की, कामानिमित्त बाहेरगावी गेलेल्या कुटुंबांना रेशनच्या धान्यासाठी गावी परतावे लागत होते मात्र यापुढे त्यांना ई कार्डच्या माध्यमातून देशभरात कुठूनही धान्य घेता येईल. महसूल सप्ताहाच्या पार्श्वभुमीवर शासनाकडून विविध उपक्रम राबविले जात असून एक हात मदतीचा उप्रकम अंतर्गत संजय गांधी निराधार योजना, विशेष अर्थ सहाय्य योजना यात लाभार्थीना लाभ मिळवून देण्यात आला. शासनाने नागरीकांसाठी सुरू केलेल्या योजना या नागरीकांपर्यत पुरविल्या जाणार आहे.