अनंत प्रेमाचं एकच नाव, आजी – आजोबा त्यांचं नाव ! चाळीसगावच्या पटेल विद्यालयात रंगला सोहळाः
संगीत खुर्ची, गायन स्पर्धेतून लुटला आनंद
चाळीसगाव : मनातल्या घालमेलीचा ठाव, अनुभवाच्या उत्तरांना वाव, अनंत प्रेमाचं एकच नाव, आजी – आजोबा त्यांचं ना…’ अशा काव्यओळीतून कृतज्ञता व्यक्त करीत व्ही. एच. पटेल प्राथ. विद्यालयात सोमवारी सकाळ व दूपार सत्रातही आजी – आजोबा दिन साजरा झाला. यावेळी उपस्थित आजी – आजोबांसाठी संगीत खुर्ची, गायन स्पर्धाही घेण्यात आली.
मोबाईल युगात कुटूंब चौकोनी होत चालली आहे. ज्येष्ठ नागरिकांचे कुटूंबातील स्थान ठळकपणे अधोरेखित व्हावे. मुलांच्या भावविश्वात आजी – आजोबांचा गोडवा कसा भरुन आहे. याची जाणीव करुन देण्यासाठी दरवर्षी १० सप्टेंबर हा दिवस आजी – आजोबा दिन म्हणून सर्वत्र साजरा केला जातो. असाच सोहळा शाळेत सोमवारी साजरा झाला. अध्यक्षस्थानी मुख्याध्यापिका मंजूषा नानकर होत्या. यावेळी व्यासपीठावर ज्येष्ठ उपशिक्षक जिजाबराव वाघ उपस्थित होते.
यशस्वितेसाठी
अनिल महाजन, मनिषा सैंदाणे, शर्वरी देशमुख, सचिन चव्हाण, अजयराव सोमवंशी, प्रशांत महाजन, स्मिता अमृतकार, दिपाली चौधरी, कविता साळुंखे, रेखा चौधरी, रंजना चौधरी, सचिन पाखले, दत्तात्रय गवळी, रोहित चव्हाण यांनी सहकार्य केले.
फुलांच्या पाकळ्या अथंरुण स्वागत
सोहळ्यासाठी उपस्थित आजी – आजोबांचे फुलांच्या पाकळ्या अथंरुण स्वागत करण्यात आले. नातवंडांनी खास आपल्या हातांनी तयार करुन आणलेली भेटकार्डे आजी – आजोबांना दिली. आपल्या नातवंडांचे निरागस प्रेम पाहतांना त्यांच्या डोळ्यात आनंदाश्रु दाटून आले होते. विद्यार्थी नातवंडांनी आपल्या आजी – आजोबांविषयी मनोगते व्यक्त केली.
.संगीत खुर्ची स्पर्धेत २०हून अधिक आजी सहभागी झाल्या. यात रत्नाबाई साहेबराव चौधरी तर गायन स्पर्धेत मंगलाबाई अरुण कोळी या आजींनी बाजी मारली. त्यांचा शाल व गुलाबपुष्प देऊन सत्कार करण्यात आला.
