धुळे : धुळे जिल्ह्यासह राज्यभरातील हजारो ठेवीदारांचे पैसे मैत्रेय गृप ऑफ कंपनीत अडकले असून ठेवीदारांच्या परताव्याची रक्कम वितरीत करण्यासाठी शासनाने समिती गठीत केली आहे त्यामुळे राज्य सरकारने ठेवीदारांचे पैसे परत करण्यासाठी तातडीने कार्यवाही करण्याचे आदेश समितीला द्यावेत, अशी मागणी आमदार कुणाल पाटील यांनी विधानसभेत केली. दरम्यान, मैत्रेय ठेवीदारांना पैसे मिळवून देण्यासाठी आपला पाठपुरावा सुरूच राहील, अशी माहिती आमदार कुणाल पाटील यांनी दिली.
2600 कोटी रुपये अडकले
महाराष्ट्र विधानसभेच्या नागपूरातील हिवाळी अधिवेशनात धुळे ग्रामीणचे आमदार कुणाल पाटील यांनी पॉईंट ऑफ इन्फॉर्मेशनच्या माध्यमातून धुळे जिल्ह्यासहह राज्यातील मैत्रेय ठेवीदारांच्या झालेल्या फसवणूकीचा मुद्दा उपस्थित केला. आमदार कुणाल पाटील यांनी सांगितले की, मैत्रेय गृप ऑफ कंपनीने राज्यातील सुमारे 2 कोटी 16 लक्ष नागरीकांचे एकूण 2600 कोटी रुपये बुडविले आहेत. सदर कंपनी सन 2009 पासून मैत्रेय गुंतवणूकदारांचे पैसे परत करण्यास टाळाटाळ करीत आहे.
तातडीने ठेवीदारांना पैसे देण्याची मागणी
तसेच या कंपनीची कार्यालयेही बंद झाली आहेत. उच्च न्यायालय, औरंगाबाद खंडपीठ पी.क्र.1361/18 दि.8 एप्रिल 2019 अन्वये एमपीआयडी कायद्यानुसार ठेवीदारांना राज्य शासनाकडून परताव्याची रक्कम वितरीत करण्यासाठी शासनाने समिती गठीत केली आहे. त्यामुळे सदर समितीला राज्य सरकारने ठेवीदारांचे पैसे परत करणेसाठी योग्य ती कार्यवाही करण्याचे आदेश द्यावेत अशी मागणी, आमदार कुणाल पाटील यांनी यावेळी केली. आमदार पाटील यांनी मैत्रेय ठेवीदारांचा जिव्हाळ्याचा प्रश्न उपस्थित केल्याबद्दल असंख्य ठेवीदारांनी समाधान व्यक्त केले आहे.
