Notorious gang of Shirpur taluka banished from Dhule-Nandurbar district धुळे : सामाजिक शांततेला अडसर ठरू पाहणार्‍यांविरोधात धुळे पोलिस दलाने धडक कारवाई सुरू केली असून पोलिसांच्या दप्तरी कुविख्यात असलेल्या चौघांच्या टोळीला धुळे व नंदुरबार जिल्ह्यातून दोन वर्षांसाठी धुळे जिल्हा पोलिस अधीक्षक श्रीकांत धीवरे यांनी हद्दपार केले आहे. या कारवाईने जिल्ह्यातील उपद्रवींच्या गोटात प्रचंड थरकाप उडाला आहे.
चौघांच्या टोळीवर कारवाई
हद्दपार झालेल्यांमध्ये आकाश उर्फ राजू सन्नाटा थोरात (26, बौद्धवाडा, शिरपूर), रोशन दत्तू थोरात (23, बौद्धवाडा, शिरपूर), विशाल उर्फ भैय्या अरुण थोरात (25, खालचे गाव, बौद्धवाडा, शिरपूर) व राकेश रमेश थोरात (30, बौद्धवाडा, शिरपूर) यांचा समावेश आहे. संशयितांविरोधात गर्दी करून दंगा करणे, सरकारी नोकरावर हल्ला करणे, सार्वजनिक मालमत्तेचे नुकसान करणे, जीवे ठार मारण्याचा प्रवेश, विनयभंग व दगडफेक आदी प्रकारचे सहा गंभीर गुन्हे शिरपूर पोलिसात दाखल होते. शिरपूर पोलिसांनी टोळीला हद्दपार करण्याबाबत जिल्हा पोलिस अधीक्षकांकडे प्रस्ताव सादर केल्यानंतर त्याची पडताळणी करण्यात आली व टोळीला धुळे व नंदुरबार जिल्ह्यात दोन वर्षांसाठी जिल्हा पोलिस अधीक्षकांनी महाराष्ट्र पोलिस अधिनियम 1951 कलम 55 अन्वये हद्दपार केले.
यांनी केली कारवाई
ही कारवाई धुळे पोलिस अधीक्षक श्रीकांत धीवरे, अपर पोलिस अधीक्षक किशोर काळे यांच्या मार्गदर्शनाखाली शिरपूर पोलिस उपअधीक्षक सचिन हिरे, धुळे गुन्हे शाखेचे वरीष्ठ निरीक्षक दत्तात्रय शिंदे, शिरपूरचे पोलिस निरीक्षक ए.एस.आगरकर, पोलिस उपनिरीक्षक संदीप मुरकुटे, हवालदार संतोष हिरे, हर्षल चौधरी तसेच शिरपूर शहरचे हवालदार ब्बार शेख व होमगार्ड नाना अहिरे यांनी केली.
