पाच हजारांची लाच भोवली : धुळ्यातील पोलिस अधिकार्यासह हवालदार धुळे एसीबीच्या जाळ्यात
अपघातग्रस्त वाहन सोडण्यासाठी लाच भोवली : फौजदाराकडे होता पोलिस ठाण्याचा प्रभारी पदभार
5000 bribe: Dhule police officer along with constable Dhule in ACB’s net धुळे : अपघातग्रस्त वाहन सोडून देण्यासाठी हवालदारामार्फत पाच हजारांची लाच घेताना धुळ्यातील देवपूर पोलिस ठाण्यातील पोलिस उपनिरीक्षकाला धुळे एसीबीने पोलिस ठाण्यातच अटक केल्याने धुळे जिल्हा पोलिस दलात प्रचंड खळबळ उडाली आहे. लाचखोरीने पुन्हा एकदा पोलिस खाते बदनाम झाले आहे. हरीश्चंद्र पाटील असे अटकेतील पोलिस उपनिरीक्षकाचे तर रवींद्र मोराणीस असे अटकेतील पोलिस हवालदाराचे नाव आहे.
वाहन सोडण्यासाठी लाच भोवली
35 वर्षीय तक्रारदार यांचे शेतीमाल वाहतुकीचे ट्रॅक्टर देवपूर पोलिस स्टेशन हद्दीत मुंबई आग्रा महामार्गावर अपघातग्रस्त झाले. या घटनेबाबत मोटर अपघात दाखल करून अपघातग्रस्त वाहन सोडून देण्यासाठी लाचखोर फौजदारासह हवालदाराने बुधवार, 17 जानेवारी रोजी पाच हजारांची लाच मागितली. तक्रारदाराने तक्रार नोंदवल्यानंतर लाचेची पडताळणी करण्यात आली व बुधवारी रात्री पोलिस ठाण्यातच दोघांना लाच स्वीकारताच अटक करण्यात आली.
यांनी केला सापळा यशस्वी
हा सापळा धुळे एसीबीचे पोलिस उपअधीक्षक अभिषेक पाटील, पोलिस निरीक्षक रुपाली खांडवी, हवालदार राजन कदम, मुकेश अहिरे, प्रवीण मोरे, संतोष पावरा, रामदास बारेला, प्रशांत बागुल, मकरंद पाटील, प्रवीण पाटील, पोहवा चालक सुधीर मोरे, जगदीश बडगुजर आदींच्या पथकाने यशस्वी केला.
प्रभारी अधिकार्याच्या अटकेने पोलिस वर्तुळात खळबळ
देवपूर पोलिस ठाण्याचे प्रभारी अधिकारी सतीश घोटेकर यांची 12 जानेवारी 2024 रोजी लोकसभा निवडणुकीच्या अनुषंगाने अहमदनगर जिल्ह्यात बदली झाल्यानंतर प्रभारी अधिकारी म्हणून हरीश्चंद्र पाटील यांच्याकडे पदभार सोपवण्यात आला होता मात्र लाच प्रकरणात प्रभारी अधिकारीच एसीबीच्या जाळ्यात अडकल्याने पोलिस दलात प्रचंड खळबळ उडाली आहे.
